Dat erkläert de President vun Eurosolar a Co-President vun de Stater Gréngen. De Paul Zens war eisen Invité vun der Redaktioun.

Mir sinn éischtens emol frou, dass et sech sou gutt entwéckelt. Et muss awer net ëmmer sou e Summer sinn ewéi elo, fir dass mat der Sonn genuch Stroum ka produzéiert ginn. D'Photovoltaikanlage vun haut wieren nämlech méi performant an et kéint ee se och, wann d'Deeg méi kuerz sinn, anescht ausriichten. Dat sot de Paul Zens den Dënschdeg de Moien. De President vun Eurosolar war eisen Invité vun der Redaktioun. Am Juli waren op ee Joer gekuckt 40 Gigatonnen erreecht ginn, par rapport zu 23,9 zejoert.

Mat der Annonce vum Energieminister Claude Turmes en Dënschdeg, dass et däitlech Präishaussë beim Gas wäert ginn, hofft de Paul Zens, dass déi Leit gehollef kréien, déi duerch déi héich Energiepräisser wäerten an d'Laberente geroden. Kuerzfristeg fir dëse Wanter kënnen erneierbar Energien, déi aktuell just 11 Prozent vum Stroumbedarf ofdecken, nämlech keng Entlaaschtung schafen. Fir d'Zukunft wier op alle Fall awer nach vill Potential do bei der Photovoltaik.

Et muss elo installéiert ginn

11 Prozent wier just een Tëschenzil. Eurosolar huet een Zenario proposéiert, wou 100 Prozent vum Stroumbedarf kann duerch erneierbar Energië gedeckt ginn. Dat wär awer dann e Mix aus Sonn, Wand, Biomass an dem grénge Waasserstoff. Et wier eng Complementaritéit, op déi et ukéim, sou de Paul Zens. Natierlech géing et kaschten ëmzestellen, mee och d'Ersetze vun enger "normaler" Heizung géing kaschten. Enger Etüd vun der Universitéit Stanford no géingen d'Käschte sech awer am Gläichgewiicht halen. Et géing kaschte jo, mee d'Folgekäschte géingen erofgoen. Haut misst een de Masutt an de Gas deier akafen, mee d'Sonn wier gratis, genee wéi de Wand an dovunner misst ee profitéieren. Dofir muss een elo installéieren.

Atomenergie ass een Auslafmodell

De meeschte Stroum gëtt hei am Land am Transport an an der Industrie benotzt. Dat kréich een och mat just erneierbare Quellen gedeckt, seet den Invité. Den Atomstroum wier een Auslafmodell a wier eng "Masturbation intellectuelle fir Fetischiste vun Atomenergie", déi kee Mënsch méi an Zukunft géing brauchen. D'Ëmstellung bräicht nach Zäit, sou de Paul Zens, mee op Atomenergie kéint ee verzichten. Et wier ee Märchen, dass se de gréissten Deel vun der Produktioun géing duerstellen. Et wier just e klenge Prozentsaz an och Frankräich wier méi domat geplot, wéi dass et sech rentéiert.

Et feelt un Elektriker a Mechatroniker

D'EU-Kommissioun schafft un enger Reform vum europäesche Stroummarché an dat begréisst de Paul Zens. Well bis elo wier et sou gewiescht, dass den deierste Produzent de Präis gemaach hätt an dat wier eng artificiell Spekulatioun.

An den Ae vum President vun Eurosolar missten elo onbedéngt d'Solaranlagen op den Diech ausgebaut ginn. Do misst insistéiert ginn. D'Biedem wären nämlech scho genuch versigelt. Och de Staat an d'Gemenge mussen hiren Deel maachen. Déi eng Gemenge géingen immens vill maachen, anerer géingen op d'Brems trëppelen. Zum Beispill kéint een de Leit hëllefe bei de Primmen. E weidere Problem wier, dass et un Handwierksbetriber, Elektriker a Mechatroniker géing feelen: Et hätt een et verschlof, fir op d'Attraktivitéit vun dem Beruff opmierksam ze maachen, sou nach de Paul Zens.

Invité vun der Redaktioun: Paul Zens

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.