Dat sot e Mëttwoch de Moien den Direkter vun der Fedil, der Stëmm vun der Lëtzebuerger Industrie, als eisen Invité vun der Redaktioun.

Dat do kann net esou weidergoen. Verschidde Betriber wäerten déi héich Stroumkäschten net kënnen acceptéieren. Do mussen Aktioune kommen, fir ze korrigéieren, wou een nëmme kann. Dat sot de Fedil-Direkter René Winkin de Mëttwoch de Moien als eisen Invité vun der Redaktioun. Verschidde Betriber wéisste wéinst den annoncéierte Präishaussë beim Gas a beim Stroum guer net méi, wat se maache sollen. Entreprisen, déi elo fir dat anert Joer nach Stroum kafe mussen, wiere mat Präisser konfrontéiert, déi dat 25facht wiere wéi bei hirem leschten Akaf. Wann dës Präisser sech duerno op d'Produktiounskäschten an der Industrie néierschloen, wier "d'Inflatioun vum nächste Joer scho gutt virbereet", sou den Direkter vun der Fedil bei eis op der Antenn.

Relatioun tëscht Stroum a Gas briechen

Duerfir géif ee sech strukturell Ännerungen op de Mäert erwaarden. Den Ament riicht sech de Präis um liberaliséierte Stroummarché nom deiersten Operateur, nom deierste Kraaftwierk. D'Präisser gi vum knappe Gas wéinst dem Ukrain-Krich gedriwwen, och wann deen nëmmen e klengen Deel ausmécht. Doduerch ass de Maart lassgekoppelt vun de reelle Produktiounskäschten. Erneierbar Energien, Stroum op Basis vu Kuel oder Nuklear sinn awer vill méi bëlleg a ginn awer sou deier gehandelt.

Dem René Winkin no misst ee fortkomme vum aktuelle System. Dee géif ufänken, pervers ze ginn a wier elo net méi ze halen. Leider hätt een de Summer verluer, fir dat ze preparéieren. Dës Woch huet d'EU-Kommissioun eng grondleeënd Reform annoncéiert. Dem René Winkin no dierft een net liichtfankeg agéieren. Wichteg wier, datt ee souwuel méi verstänneg Präisser erreecht, an engems d'Präisssignal awer net verléiert. Vun der Lëtzebuerger Regierung erwaart sech d'Fedil, datt se konstruktiv un der Reform matschafft.

Et kéint ee schliisslech och kengem Betrib erklären, datt e misst dekarboniséieren – also fortkomme vu Gas a Masutt – an op Elektresch setzen, wann d'Präisser esou bleiwe wéi den Ament. Kloer wier, d'Relatioun tëscht Stroum a Gas muss gebrach ginn.

Beim Gas, dee komplett vu bausse kënnt, wier et méi schwéier, do kéint een héchstens no Alternative sichen.

Ugeschwat op d'Enn vum Tankrabatt en Donneschdeg, sot de René Winkin, datt an den nächste Méint op d'mannst laanscht déi franséisch Grenz weider Aktivitéiten abrieche géifen an de Staat doduerch Recettë verléiert. Well d'Regierung d'Decisioun geholl huet, sech net u Frankräich ze alignéieren, déi den Tankrabatt jo bis Enn dës Joers elo verlängert hunn.

Verschidde Betriber hunn hir Produktioun scho reduzéiert

Zanter Joren hätt d'Industrie e fräiwëllegen Accord mat der Regierung, fir d'Energieeffizienz ze verbesseren. Op deem Niveau misst ee sech weider keng Suerge maachen. Méiglech wier och, zäitweileg op aner Energieressourcë wéi Gas ze switchen. Duerfir géif een awer Autorisatioune brauchen. Verschidde Betriber géifen zanter Jore probéieren, op Biomass ëmzeklammen, hätten et bis ewell awer net autoriséiert kritt. Do misst et elo méi séier goen.

Manner produzéieren, wier net onbedéngt wënschenswäert. Et wier sech awer ze erwaarden, datt dat konjunkturbedéngt awer an den nächste Méint geschitt. Hien huet d'Beispill Elektronik an de Bau genannt, wou et scho manner gutt dréit. Verschidde Multinationalle kéinten hir Aktivitéiten och verleeën, ausserhalb vun Europa.

Dem René Winkin no hunn och scho Betriber wéinst den héije Präisser hir Produktioun reduzéiert. Fir ze verhënneren, datt Entreprisen de Gaskrunn zougedréit kréien, wier d'Solidaritéit vun alle Secteure gefuerdert. Jidderee misst Efforte maache fir ze spueren. Da kéint een och d'Spuerzil vu 15% bis Mäerz och erfëllen. Verschidde Betriber géife sech awer schonn drop preparéiere mussen, kuerzzäiteg zouzemaachen, sou eisen Invité.

Invité vun der Redaktioun: René Winkin

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.