En Dënschdeg de Moie war d'Presidentin vum Stater Geschäftsverband eis Invitée vun der Redaktioun.

Déi meescht Geschäftsleit si ganz zefridde mat der Braderie. Dat sot d'Mireille Rahmé-Bley en Dënschdegmoien als eis Invitée vun der Redaktioun. D'Presidentin vum Stater Geschäftsverband hätt um Méindeg generell positiv Echoe vun hiren iwwer 400 Membere kritt.

D'Saison allgemeng wier och relativ gutt gelaf. D'Stroosse wiere gutt gefëllt, och duerch dat waarmt Wieder. D'Touriste wieren nees an der Stad, d'Leit hätten nees Loscht eraus ze goen, mä d'Clientë géife méi geziilt akafen. Präistechnesch misst ee kompetitiv bleiwen, dat wier awer net einfach zu Zäite vun héijer Inflatioun.

Problematesch wier de Commerce iwwerdeems weiderhin op der Gare. Virun allem an der Avenue de la gare, wou wierklech vill eidel stéing. Den Tram-Chantier an d'Sécherheet wieren zwee Grënn, seet d'UCVL-Presidentin. Et géife villäicht zwee gréisser Zuchpäerd gebraucht ginn, fir Clienten a weider Commercen unzezéien. Et wären och Marke vun der Gare fortgaangen an hätte sech op der Cloche d'Or néiergelooss. Dat wär schonn eng Konkurrenz.

Als de gréisste Problem bezeechent d'Mireille Rahmé-Bley iwwerdeems d'Sécherheet an der Stad. Et géif ganz vill an ëmmer méi geklaut ginn. Et kéint ee jo net de Leit soen, "kommt an d'Stad, mä loosst Är Auer, Bijouen an de Portmonni doheem". Et misst eppes geschéien a Punkto organiséierten Heeschtourismus. Besonnesch eeler Leit hätten Angscht an d'Stad ze kommen. De Service "A vos côtés" géif schonn hëllefen, mä generell misst d'Attraktivitéit vun der Stad verbessert ginn. Et misst méi organiséiert ginn. Da géif een och gesinn, datt d'Leit kommen.

Sonndes sollten d'Geschäfter ophunn, do kéint een awer kengem eppes virschreiwen, sou d'Presidentin vum Stater Geschäftsverband. Datt e Salarié am Commerce just 4 Stonne laang däerf sonndes schaffen, géif och net hëllefen. Do misst legislativ nogebessert ginn.

Invité vun der Redaktioun: Mireille Rahmé-Bley

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.