E Mëttwoch de Moie war den Direkter vu Greenpeace Lëtzebuerg eisen Invité vun der Redaktioun.

Mir sollen eis net just op eng eenzeg Kris – d’Energiekris – fokusséieren. Et geet allgemeng ëm d’Zukunft. Ëm grondsätzlech Froen, wéi mer wëlle liewen, sot de Mëttwoch de Moien de Raymond Aendekerk. Den Direkter vu Greenpeace war eisen Invité vun der Redaktioun. D’ekonomescht Liewen, wéi mer et aktuell kennen, wär ferm um Wackelen.

En Donneschdeg de Moie gëtt déi national Energie-Spuercampagne virgestallt. Zanter August an nach bis Enn Mäerz ass all EU-Land opgefuerdert, 15% Gas ze spueren. All Campagne wär gutt, wou mer all Mënsch kënne mathuelen, sot de Greenpeace-Direkter. Et wär schonn Zäit verluer gaangen, mä fir Pessimismus wär et ze spéit. Jidderee kéint spueren. Zum Beispill wann ee méi lues mam Auto fiert. Vill Problemer, op déi Greenpeace schonn zanter deels Joerzéngte géif opmierksam maachen, géife sech elo summéieren. Léisunge wieren lokal net dran, mä misste global fonnt ginn. Well d’Kris mënschegemaach wär, kéinte mer se awer och änneren. Et wär jo keng Naturkatastroph.

Bei allen Téitschen, déi eis Gesellschaft huet, wier et eis awer nach ni sou gutt gaange wéi haut. De Wuelstand war nach ni sou grouss. Dat misst een och kloer soen, och wa Saache wéi beispillsweis d’Energie-Transitioun verschlof goufen.

Greenpeace ënnerstëtzt cibléiert Aktiounen, keen Tankrabatt, awer eng CO2-Steier. De Staat géif och vill Sue verschwenden. Eng anstänneg Steierreform wär néideg. Op EU-Niveau gëtt elo iwwer eng "Iwwergewënnsteier" diskutéiert. Et wär besser, wann et net zu deenen héije Gewënner géif kommen, mengt de Raymond Aendekerk. Well d’Léisunge wäre komplizéiert an zum Beispill sou héich Beneficer géifen och fir Mëssstëmmung an der Gesellschaft suergen.

Invité vun der Redaktioun: Raymond Aendekerk

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.