Dat seet de Generaldirekter vun ArcelorMittal zu Lëtzebuerg als Invité vun de Redaktioun iwwert de Plan de délestage, deen nach ëmmer net fäerdeg ass.

Et ka keen haut soen, wéi d'Situatioun am November oder am Dezember ass, mä fir den Ament gesäit ArcelorMittal net vir, e Wierk zu Lëtzebuerg zouzemaachen oder op Kuerzaarbecht zréckzegräifen. Dat sot de Generaldirekter vum Stolgrupp Roland Bastian e Freideg de Moien hei op der Antenn, als Invité vun der Redaktioun. D'Lëtzebuerger Sitte wieren zwar staark betraff duerch déi héich Energiepräisser, ma et wieren nach genuch Commanden do.

D'Consommatioun an de Besoin u Stol ginn erof, net just wéinst den héijen Energiepräisser an der ekonomescher Situatioun, ma och wéinst de Käschten duerch d'CO2-Quoten an doduerch, datt Produzenten aus anere Länner op den europäesche Marché kommen, seet de Roland Bastian. Hei am Land kéint een d'Energiepräisser nach aschränken, de Stroum wier nämlech net zu all Moment d'selwecht deier.

"An de Moiesstonnen an an den Owesstonnen, wann d'Leit doheem sinn, wa gekacht gëtt, wann d'Frigoen op- an zougemaach ginn, am Wanter och nach wa gehëtzt gëtt, wou da Pointë sinn, wou de Stroum da wierklech extrem deier gëtt, an do hu mer dann en Atout mat eisen Elektroiewen, dat si flexibel Anlagen hautzedaags, do kann een dann decidéieren, fir d'Käschten net komplett explodéieren ze loossen, déi wärend zwou Stonnen zouzesetzen."

Doriwwer eraus wier de Prozess bei den Elektroiewen esou adaptéiert ginn, datt komplett kéint op Gas verzicht ginn, doduerch kéinte 5 bis 10 Prozent vum Konsum agespuert ginn, dobäi kéimen nach aner Spuermesuren.

"Wann et zu enger richteger Coupure kënnt, da musse mer eis mat deenen aneren Industriellen, mat der Creos, mat der Fedil, an och mat all den Acteuren un en Dësch setzen, fir ze kucken, dass mer dann déi Reduktioun vun der Produktioun, déi da jo wäert néideg ginn, dass mer déi méiglechst gläichméisseg op d'Acteure verdeelen."

Den neie Plan de délestage, wie wéini vum Netz geholl gëtt, wier nämlech nach net fäerdeg, huet de Roland Bastian bedauert.

D'Schmelz an der Ukrain vum Lëtzebuerger Betrib wier zanter e puer Méint nees zu 10 bis 20 Prozent ausgelaascht an d'Schmelz am Kasachstan produzéiert nees fir de russesche Maart.

"De gudde Wëlle war effektiv do, fir net méi a Russland ze liwweren, et ass gesicht ginn, fir aner Marchéë fir déi Produkter ze fannen, mä et muss ee wëssen, et ass e Wierk vu 35.000 Leit, do hänken net nëmmen déi Leit dovun of, déi hu jo Famillen. Dat heescht do ass eng grouss Zuel vu Leit betraff, an do huet déi lokal Direktioun d'Responsabilitéit iwwerholl, mir liwweren erëm."

En vue vum EU-Energieminister Conseil den Ament zu Bréissel huet den ArcelorMittal-Direkter nach gefuerdert, datt d'Industrie ënnert d'Äerm gegraff kritt.

Invité vun der Redaktioun Bastian / Resumé Fanny Kinsch
Invité vun der Redactioun - Roland Bastian

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.