En Dënschdeg de Moie war de President vun der Chambre des Métiers eisen Invité vun der Redaktioun.

D'Situatioun am Handwierk ass ganz ugespaant. Am zweeten Trimester ass eng Stagnatioun vun der Aktivitéit festgestallt ginn an am Bau souguer e Réckgang. Dat sot de President vun der Chambre des Métiers. Den Tom Oberweis war en Dënschdeg de Moien eisen Invité vun der Redaktioun. Donieft wieren d'Käschten an de Betriber explodéiert, souwuel bei der Energie, wéi och bei de Liewensmëttel. 100 Prozent Präishausse beim Zocker, 86 Prozent beim Miel, 93 Prozent beim Holz wieren haut eng Realitéit. Zousätzlech wieren och nach d'Salairen ënnert anerem duerch d'Indextranche geklommen. Elo géing nach eng Tranche am Oktober dobäikommen an eng am Abrëll d'nächst Joer. Déi finanziell Reserve wieren also staark ugeschloen a wieren dat och scho wéinst der Corona-Pandemie gewiescht, trotz den Hëllefen, sou den Tom Oberweis.

D'Betriber géingen aktuell zécken, fir Investissementer an d'Clientë fir Commanden ze maachen. Deementspriechend wieren d'Prognosen net roseg. Et fäert ee carrement eng Rezessioun, sou de President vun der Handwierkerkammer.

Wat déi voll Carnet de commandes ugeet vun de Betriber, vun deenen ëmmer geschwat gëtt, déi misst een an de Kontext setzen. Duerch d'Pandemie wieren d'Commanden eropgaangen, well deelweis net konnt geschafft ginn, och duerch Absencen an donieft géing et och allgemeng u Leit feelen. Mee aktuell géinge vill Betriber drënner leiden, dass vill Leit duerch d'Energiekris wéilte spueren an hir Commanden zeréckzéien.

Vun der Tripartite erwaart ee sech am Handwierk, dass een enger méiglecher Rezessioun entgéintwierkt, awer gläichzäiteg d'Aarbechtsplaze garantéiert a virun allem dierft d'3er-Ronn net elo scho wal-politesch ausgenotzt ginn. Eng Indextranche géing d'Handwierk 70 bis 80 Milliounen Euro kaschten. D'Unioun vun de Lëtzebuerger Entreprisë géif mat de Léisungsvirschléi aus dem Handwierk an d'Tripartite eragoen, mä kloer wier schonn, dass d'Ausbezuele vun enger zousätzlecher Indextranche fir de Secteur net dra wier. De System u sech géing een awer net a Fro stellen, sou nach den Tom Oberweis.

Invité vun der Redaktioun: Tom Oberweis

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.