Dat sot e Mëttwoch de Moien d'Presidentin vum OGBL als eis Invitée vun der Redaktioun am Hibléck op d'Tripartite déi nächsten Deeg.

Een Net-Ausbezuele vun der nächster Indextranche ass fir eis net dran. Mir sinn an enger Kafkraaft-Kris an d'Situatioun ass och ganz ugespaant fir d'Leit. Dat huet d'OGBL-Presidentin Nora Back am RTL-Interview e Mëttwoch de Moien op en Neits ënnerstrach. Et wier een net an enger Wirtschaftskris an och net an enger Rezessioun. Den Emploi wier héich, de Chômage niddreg an et géingen och bal keng Faillitte ginn an dat misst ëmmer mol nees betount ginn, erkläert d'OGBL-Presidentin. Dat wier Schwaarzmolerei a keng Realitéit.

Grouss Entreprisë géife nach ëmmer e gudde Chiffre d'Affaires realiséieren, zum Beispill am Banken- a Pëtrolssecteur. Donieft hätt zum Beispill e Grupp Cactus dat lescht Joer nach 60 Milliounen un Dividenden ausbezuelt an do géingen zwou Indextranchen emol keng 6 Milliounen ausmaachen, erkläert d'Nora Back. Eng Enquête bei Entrepreneuren am Handwierk aus dem August hätt iwwerdeems gewisen, dass 70 Prozent vun den Entreprisen uginn, dass hir Aktivitéit stabil wier an 20 Prozent géinge souguer soen, dass se géing an d'Luucht goen. D'Entreprisë kéinten also eng Indextranche stemmen. Natierlech géingen et Krisegewënner a Kriseverléierer ginn. Besonnesch kleng- a mëttelgrouss Betriber géingen déi héich Energie a Liewensmëttelpräisser spieren.

Besonnesch d'Leit bräichten awer elo Hëllef an dofir kämpft den OGBL weiderhi fir den Erhalt vum Index, mä deen eleng géing net duergoen, well den Index jo just de Verloscht vun der Kafkraaft géif opfänken. Donieft misst onbedéngt de Steierbarème un den Index ugepasst ginn. Och eng Energieprimm, wei d'Pirate se an d'Spill bruecht haten, wier eng interessant Pist, ma si wéilt der Tripartite awer net virgräifen, sou d'OGBL-Presidentin Nora Back.

Wéi déi leschte Kéier géing een och elo als Gewerkschaften zu 3 geschlossen an d'Tripartite goen a versichen, eng Positioun ze vertrieden. Um Enn misst awer jiddereen eenzel seng Decisioun huelen. D'Invitée hofft dann och, dass d'Verhandlungen e Sonndeg gutt preparéiert goufen an dass net nees ënner Zäitdrock verhandelt gëtt. Et hofft een och déi Donnéeën ze kréien, déi ee brauch, fir kënnen eng Bestandsopnam ze maachen an déi richteg Mesuren ze huelen, sou d'Nora Back.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.