De Luxair-CEO war en Dënschdeg de Moien eisen Invité vun der Redaktioun.

"Ech sinn do, fir d'Luxair an d'Luucht ze kréien", sou den Direkter vun der Lëtzebuerger Airline, de Gilles Feith, en Dënschdeg de Moien hei op RTL. Hien huet assuréiert, hie wier net mam Optrag agestallt ginn, fir bei der Luxair "opzeraumen". Alles wat hie géing maachen, wier "mat ganz vill Häerz a ganz vill Motivatioun". Wat Rumeuren iwwert säin Depart uginn: Do wier näischt drun.

Op der Aviatiounstripartite e Méindeg wiere sech Regierung, Luxair-Direktioun a Gewerkschaften eens gewiescht, datt d'Luxair muss moderniséiert ginn. De Luxair-Direkter sot d'Changementer, déi bei der Airline misste kommen, natierlech am Aklang mat de Leit misste gemaach ginn. Mat Hëllef vum Staat, vum Steierzueler oder vun iergendengem kéint d'Luxair net rechnen, well d'Aviatioun wier e ganz liberale Secteur.

D'Kritik iwwert schlecht Aarbechtskonditioune bei der Luxair misst een dem Gilles Feith no an de Kontext setzen. "De Management" a "ganz vill motivéiert a gutt Leit" bei der Luxair hätten et fäerdegbruecht, no der Pandemie d'Compagnie nees "vum Buedem an d'Loft ze kréien". D'Luxair hätt senger Meenung no och, trotz vill Konkurrenz, en attraktive Kollektivvertrag. Et hätte vill Leit d'Airline verlooss, ma si géingen och vill Leit astellen an et géinge sech och vill Leit fir déi Poste mellen. Op der anerer Säit huet hien zouginn, datt et am Summer méi Aarbecht fir d'Leit gouf an den Absenteismus héisch wier. Mee "Fatiguen", Middegkeet also, géing et a sengen Aen aktuell an all Secteur ginn.

Datt de Verwaltungsrot vun der Luxair decidéiert huet, de fréiere Procureur général d'Etat Robert Biever als Mediateur anzestellen, dat fënnt de Gilles Feith "eng ganz gutt Saach". Fir hie géing dat bedeiten, datt d'Direktioun an d'Personalvertrieder mussen en "terrain d’entente" fannen an d'Diskussiounen net op der Place publique sinn. D'Mediatioun géing hëllefen, d'Problemer ze léisen, déi vläicht nach do wieren, esou de Gilles Feith.

Op d'Remark, datt d'Mediatioun awer weise géing, datt hien et net fäerdegbréngt, mënschlech mam Personal eens ze ginn, huet de Gilles Feith geäntwert: "Et mécht net een alles". Eng Firma vun 3.000 Leit géing net vun enger Persoun eleng dirigéiert ginn. Hien hätt eng Management-Ekipp vu 4-5 Leit op senger Säit, fir d'Defien, mat där d'Airline confrontéiert ass, unzegoen. Defien ewéi den Ëmgank mat der Energiekris oder d'Investissementer an nei Gebaier an an d'Flott, déi schonn zanter Joren néideg gewiescht wieren.

Zum Sujet Investissementer bei der Luxair gouf e Reportage en Dënschdeg den Owend op der Tëlee diffuséiert.

Invité vun der Redaktioun: Gilles Feith

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.