E Méindeg de Moie war den LSAP-Fraktiounspresident eisen Invité vun der Redaktioun.

D'Ukrain séchert sech am Krich gären d'Ënnerstëtzung vum Westen an dowéinst ginn ëmmer nees Parlamentarier invitéiert, fir sech e Bild op der Plaz ze maachen. Och de President vun der aussepolitescher Chamberkommissioun Yves Cruchten war an deem Kontext d'lescht Woch zu Kiew. Am RTL-Interview e Méindeg de Moie war et dem LSAP-Politiker wichteg ze ënnersträichen, dass d'Ukrain och fir eis Fräiheet matkämpft - och wann dat pathetesch géing kléngen. Spéitstens nom russesche President senger Ried d'lescht Woch wier kloer, dass de Wladimir Putin och de liberalen, fräie Weste mam Krich géing viséieren. An ob mir et wéilten oder net, wiere mir direkt mat an de Krich implizéiert duerch den Energie-Krich géint de Westen.

Wat hie komplett impressionéiert hätt, wier d'Determinatioun an d'Motivatioun vun den Ukrainer, fir dëse Krich ze gewannen, sou den Yves Cruchten. A Gespréicher hätt hien och eraushéieren, dass Kiew fréier oder spéider mat engem russeschen Atomschlag rechent. D'Ukrainer wiere prett ze verhandelen, mee si géinge sech net méi un ee Verhandlungsdësch sëtze mam Wladimir Putin. Deemno géing et wuel soubal keen Enn vum Krich ginn.

D'Ausso vum ADR-Deputéierte Fernand Kartheiser, dass och mat reguläre Referenden an der Ukrain déi nämmlecht pro-russesch Haltung erauskomm wier, deet den LSAP-Fraktiounspresident just de Kapp rëselen. Een, deen esou Saache géing soen, wier just een Handlanger fir de Wladimir Putin. De Fernand Kartheiser géing genee wéi aner rietsradikal a rietspopulistesch Parteien den Diktus vum Kreml ënnert d'Leit bréngen an dofir hätt hien absolut kee Versteesdemech. Den Yves Cruchten huet ënnerstrach, dass d'Referenden, fir 4 ukrainesch Regiounen ze annektéierten, eng Farce wieren an och der EU net géingen unerkannt ginn.

Invité vun der Redaktioun: Yves Cruchten

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.