Dat sot de President vun der Chambre de Commerce e Mëttwoch de Moien an der Emissioun Invité vun der Redaktioun.

Mir sinn an enger ganz graver Kris – fir d'Entreprisen a fir d'Leit. Den Tripartitesaccord ass do wéi eng éischt Hëllef, awer net d'Operatioun, déi de Patient brauch. Dat sot de Luc Frieden e Mëttwoch de Moien am RTL-Interview. De President vun der Chambre de Commerce vermësst Previsibilitéit fir d'Betriber a rechent mat zwou, souguer dräi Indextranchen d'nächst Joer. Donieft dierft een net déi "Zweet-Ronn-Effeten" ausklammeren. Wann d'Salairen nämlech an d'Luucht ginn, da ginn och d'Präisser an d'Luucht an dat schuet der Kompetitivitéit vun deene Betriber, déi och am Ausland aktiv sinn. Dat wieren notamment d'Industrie an de Finanzsecteur.

Kuerzfristeg hätt ee mam Tripartitesaccord Previsibilitéit, ma mëttel- a laangfristeg net. Zum Beispill hätt d'Decisioun, fir maximal eng Indextranche d'Joer auszebezuelen, méi Previsibilitéit ginn. De fréiere Finanzminister fuerdert dowéinst strukturell Reformen ewéi eng Deckelung vum Index op dräimol de Mindestloun. Dat hätt och zur Kompetitivitéit vun de Betriber bäigedroen. Hie freet sech och, wéi de Staat eng drëtt Indextranche d'nächst Joer, wéi ausgemaach, wëll finanzéieren. Eng Indextranche kascht d'Betriber den Ament nämlech ronn 650 Milliounen Euro. Déi hunn d'Betriber net an déi huet de Staat och net.

Mir mussen nees zeréck an eng gesond Finanzpolitik kommen, sou de Luc Frieden. Et wier richteg, dass een an der Kris hëlleft, mee wat falsch gemaach gi wier, wier, dass et an de gudde Joren dertëscht verpasst gouf, fir genuch Reserven opzebauen. Zanter, dass et den Euro gëtt, wier d'Staatsschold nach ni esou héich gewiescht ewéi elo. An enger Kris wier et net, fir mat der Strenz ze verdeelen, mee et misst een d'Finanzpolitik geziilt op déi Betriber an déi Leit leeden, déi et brauchen. Wann ee mat der Strenz verdeelt, da géing een d'Inflatioun nach eropdreiwen. Zu dësem Ament kéint de Staat och keng Upassung vum Steierbarème un d'Inflatioun maachen, erkläert de fréiere Finanzminister. Et bräicht fir d'éischt strukturell Reformen. Zum Beispill misst een iwwer de Finanzement vun de Pensioune schwätzen, och den Index-System misst op de Leescht geholl ginn an d'Effikassitéit vun den ëffentlechen Depensë misst iwwerschafft ginn.

De Luc Frieden ass och President vum Verwaltungsrot an der BIL. Et géif derbäi bleiwen, datt d'Bank hir 13% Parte bei der Luxair verkeeft. Den Zäitpunkt misst awer nach mat den aneren Aktionären definéiert ginn, sou den Invité.

Invité vun der Redaktioun: Luc Frieden

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.