E Mëttwoch de Moie war de Generalsekretär vun der Federatioun vun den Hotelieren, Restaurateuren a Cafetieren eisen Invité vun der Redaktioun.

D'Federatioun vun den Hotelieren, Restaurateuren a Cafetiere begréisst, datt mat dëser Regierung keng Steierhausse komme sollen. Dat wier gutt fir d'Planungssécherheet vun den Entreprisen, sou de Generalsekretär vun der Horesca François Koepp e Mëttwoch de Moie bei eis am RTL-Interview. D'Steierlandschaft misst awer moderniséiert ginn, fir am internationale Verglach kompetitiv ze bleiwen. Lëtzebuerg misst och weider Talenter kënnen unzéien.

Den Horeca-Secteur läit den Ament natierlech och ënnert der héijer Inflatioun, déi scho virum Krich an der Ukrain ugefaangen hätt. Verschidde Produite wieren elo bis zu 40% méi deier ginn an et wier ee scho méi laang mat Enkpäss bei verschiddene Liewensmëttel konfrontéiert.

Kafkraaft erhalen ass méi wichteg wéi Indextranchë bezuelen

Dem Generalsekretär vun der Horesca no, géifen d'Clienten zum Deel ufänken ze spueren.  Besonnesch déi eeler Clientèle.

Dowéinst wier et wichteg, datt d'Tripartites-Mesuren elo séier bei de Leit ukommen, fir hier Kafkraaft z'erhalen.  D'Tripartite hätt, dem Generalsekretär vun der Horesca no, am Zeeche vum soziale Fridde gestanen a wier manner gemënzt gewiescht fir de Betriber ze hëllefen. Duerfir hätt ee gekuckt fir d'Inflatioun gebremst ze kréien. Kafkraaft erhale wier nämlech méi wichteg wéi Indextranchen auszebezuelen.

Zanter der Pandemie an dem méi verstäerkten Teletravail kéime manner Leit an de Restaurant iessen. Och haut nach, bedauert de François Koepp. Den Homeoffice géif och Gefore mat sech bréngen.

"Et ass kee Personal a ganz Europa"

E weidere Probleem ass de grousse Personalmanktem am Horeca-Secteur. 1.500 Leit géifen dem Secteur feelen. Qualifizéierter a manner Qualifizéierter. Et hätt een an der Pandemie eng ganz Partie Leit verluer. Net well se gekënnegt kritt hätten, mä well si sech ëmorientéiert hunn an elo net méi zréck an de fréiere Beruff wëllen.

A ganz Europa géif ee keng Leit méi fannen, sou nach de François Koepp vun der Horesca. Duerfir misst ee scho méi wäit siche goen fir Leit op Lëtzebuerg unzezéien. De Generalsekretär vun der Horesca huet d'Beispill Vietnam a Cap Vert genannt.

Pilotprojet Krunnewaasser: Et gëtt kee gratis Waasser am Restaurant

Ganz retizent, esou kann een dem Secteur seng Haltung zu den Iwwerleeungen duerstellen, fir nieft dem Mineralwaasser och Krunnewaasser am Restaurant unzebidden. De François Koepp huet sech e Mëttwoch de Moie felicitéiert, datt d'Horesca duerchgesat kritt hätt, datt de Service fräiwëlleg ass an een elo mol e Pilotprojet lancéiert. Amplaz datt d'Regierung higaange wier a vun uewen erof duerchgesat hätt, datt d'Restauranten hire Clientë misste Krunnewaasser ubidden.

D'Leit missten och wëssen, datt de Service net gratis wäert sinn. Eng iewescht Limitt ass och net virgesinn. All Betrib ass fräi ze froen, wat hie fir richteg fënnt. Iergendwou misst ee seng Marge berechnen. Et géif och net drëm goen, fir de lokale Waassermarché ze verdrängen, sou de François Koepp.

12/10/2022 Invité vun der Redaktioun

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.