Esou beschreift de President vun der Doktesch an Zänndokteschassociatioun déi aktuell Situatioun am Gesondheetssecteur.

2,35 Doktere pro 1.000 Awunner, sinn der am internationale Verglach ganz wéineg. Donieft wier et eng al Altersstruktur bei den Dokteren an et ginn der och net genuch fir déi vill Aarbecht an de Spideeler. Och déi jonk Doktere wieren net zefridden. Déi national Gesondheetspolitik gouf vum President vun der Doktesch-Associatioun AMMD nach eemol ferm kritiséiert. Den Dr Alain Schmit war no der extraordinärer Generalversammlung e Mëttwoch en Donneschdeg de Moie bei eis am Studio.

Um Gesondheetsdësch hätt een et net fäerdeg bruecht, iwwert eng intelligent vernetzt medezinesch Versuergung ze schwätzen. D'Iddie vun der AMMD wieren och net consideréiert ginn. An de leschten 10-20 Joer hätt een et verpasst op d'Primärmedezin ze setzen, also op den Hausdokter an den Zänndokter. Dofir wier de Besoin fir d'Spidolsmedezin gewuess an deemno och den Aarbechtsvolume. Donieft kéinten d'Dokteren an de Spideeler sech net entwéckelen an nei Offeren ubidden. Dofir misst een elo d'Primärmedezin stäerken an och d'Sekundärmedezin opsplécken op zwee Pilieren. Dat eent wier déi Medezin, déi d'Spezialiste selwer kéinte steieren an den 2. Pilier wier d'Spidolsmedezin fir schwéierkrank Leit an dat Ganzt misst vernetzt ginn.

Garden an Astreinten: Gesondheetsministère reagéiert

Wat Garden, respektiv Astreinten ugeet, ass ee sech och net eens: De Gesondheetsministère proposéiert ronn 22 Euro d'Stonn an der Woch fir eng Astreinte a 40 Euro de Weekend. D'Doktere wëlle 40 Euro d'Stonn, egal ob an der Woch oder Weekends. Fir eng Astreinte muss een Dokter a "Ruffbereetschaft" sinn an net sur place, präziséiert den Dr Alain Schmit.

De Gesondheetsministère widdersprécht en Donneschdeg de Moie via Communiqué allerdéngs der AMMD. Hir lescht Propos fir d'Astreinte hätt effektiv bei 40 Euro d'Stonn geleeën. Dat souwuel an der Woch wéi de Weekend. D'Garden (sur place) solle mat 96 Euro d'Stonn remuneréiert ginn. Dës Indemnisatioune wieren natierlech komplementar zu deenen Tariffer, déi d'Dokteren da fir eng Consultatioun verrechnen, sou de Gesondheetsministère.

D'Dokteschassociatioun AMMD wëll elo op d'Patienten duergoen an hinnen d'Probleemer erklären. Wann een net kéint mat der Politik schwätzen, da misst een dat ebe mat de Patiente maachen. Op e méigleche Streik ugeschwat, sot den Dr Alain Schmit, datt ee jo de Facto schonn an engem latente Streik wier, ouni et ze wëllen, well een eben net genuch Leit hätt.

D'Spidolsfederatioun "am Schlepptau vun der Politik"

De President vun der Spidolsfederatioun, den Dr Philippe Turk, hat der AMMD Polemik reprochéiert. Dorop äntwert den Invité, dass et een Ënnerscheed tëscht Polemik a Kritik géing ginn. D'Spidolsfederatioun wier net gewëllt, de Problem richteg z'erkennen an zesummen doriwwer ze diskutéieren. D'Spidolsfederatioun wier donieft "am Schlepptau vun der Politik" dran an dofir dierft ee sech vun hinne keng frontal Kritik vun der Gesondheetspolitik erwaarden, well d'Direktioune vun de Spideeler vun der Politik ofhängeg sinn.

Invité vun der Redaktioun: Dr Alain Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.