E Méindeg de Moie war de President vun der Spidolsfederatioun eisen Invité vun der Redaktioun.

Et gëtt vill Leit mat Parteikaarten, och an der AMMD. Am Verwaltungsrot vun der Spidolsfederatioun wären 20 Leit an domat och eng Diversitéit vu politeschen Opiniounen. Et wier ee politesch onofhängeg. D'Dokteschassociatioun AMMD géif pauschal Onwourechte verbreeden. Dat huet den Dr. Philippe Turk e Méindeg de Moien ënnerstrach. De President vun der Spidolsfederatioun war eisen Invité vun der Redaktioun.

A ganz Europa géifen et personell Probleemer an de Spideeler ginn. Dat wier bekannt zanter Joren an net eréischt déi lescht 14 Deeg. Et kéint een awer net vun enger Dokterflucht schwätzen an et géif och weider rekrutéiert ginn. Et hätt ee Chifferen, mee där huet den Dr. Turk am Interview keng genannt. Zu Ettelbréck wier effektiv ee punktuelle Problem mat 6 Kardiologen, déi demissionéiert hunn. Ma d'Spideeler géinge vill rekrutéieren.

D'Dokteren an de Spideeler wieren och net all onzefridden, ma verschiddener géingen et eben méi kamoud fannen, fir an enger Praxis ze schaffen, wéi an engem Spidol. Do wieren d'Tariffstrukturen an enger Rei Spezialitéite méi attraktiv wéi an de Spideeler.  De President vun der Spidolsfederatioun freet sech an dem Fall awer, wat d'Deontologie wär vun deene Leit fir eng Hand unzepaken am Gesondheetssystem a sécherzestellen, dass d'Patiente weiderhi gutt versuergt sinn. Donieft wier dat Finanziellt natierlech och e Grond, well d'Dokteren an de Spideeler d'Garden/Astreinten net bezuelt kréichen, ma och well et no der Pandemie een Ermiddungsphänomeen beim Personal gouf. Dofir misst een d'Spideeler fir Dokteren nees méi attraktiv maachen.

D'Spidolsfederatioun ënnerstëtzt iwwerdeems de Gesetzesprojet iwwer de virage ambulatoire. Den Text wier jo entstanen, wéinst dem IRM an engem private Cabinet um Potaschbierg. Bis ewell wéisst keen, wat de Besoin wier am Secteur extrahospitalier. Et géing keng Carte sanitaire ginn. Wat wëll de Patient? Op wéi enger Plaz soll ee wéi eng Offere maachen? Et géing ee Flou artistique ginn, sou den Dr. Turk. Dofir géing een de Gesetzesprojet ënnerstëtzen, well et wier wichteg, dass déi Gerance an der Hand vun de Spideeler bleift, fir z'evitéieren, dass een eng deloyal Konkurrenz aus engem liberale Secteur kritt. An de Länner mat engem duebele System, engem Ëffentlechen an engem Liberalen, do géing ee gesinn, dass d'Performance vum System vill méi schlecht wier, wéi eisen Eegenen, esou den Dr. Philippe Turk. Dofir misst no kreative Léisunge gesicht ginn.

Invité vun der Redaktioun: Dr. Philippe Turk

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.