Dat preziséiert déi bekannt däitsch Anti-Auto-Aktivistin a Schrëftstellerin en Dënschdeg de Moien als eis Invitée vun der Redaktioun.

Fir eng méi nohalteg Mobilitéit, déi op de Mënsch zentréiert ass, soll een de Choix hunn. Et géinge vill Regioune ginn, wou een op den Auto ugewisen ass, well ee soss net mobil wier. An den Auto soll gären nach bleiwen, mä net méi als eenzeg Léisung. Dat sot d'Katja Diehl en Dënschdeg de Moien. Déi däitsch Schrëftstellerin a Beroderin fir nohalteg an inklusiv Mobilitéit war eis Invitée vun der Redaktioun.

Et muss een Alternative schafen an dofir brauch ee couragéiert Politiker, déi d'Mobilitéitsoffer ausbauen an d'Privileegie vum Auto ofschafen. Et misste manner Parkplazen zur Verfügung stoen a se missten och méi deier ginn. Donieft bräicht et méi Fuergemeinschaften an et misst een och manner Auto- an dofir méi Vëlosspuere bauen. Kee Wee ze maachen, wier ëmmer nach déi beschte Léisung, sou d'Expertin. Haut kéint ee villes digital maachen. An Däitschland kéinten zum Beispill 60 Prozent vun den Aarbechten digital gemaach ginn. Dat misst och net doheem sinn am Homeoffice, mä zum Beispill an engem Co-Working-Space.

De ländleche Raum wier natierlech méi problematesch an dofir och net hiren éischte Fokus. Do kéint een awer kleng an elektresch Autoe kafen. Donieft misst een "d'Mobilitéitslächer" zoumaachen, andeems een e System mat E-Scooteren oder Vëloen, fir auszeléinen, an e Ruff-Bus-System géing aféieren. Hei am Land géingen och vill grouss Autoe fueren, wou awer all Kéier just eng Persoun drasëtzt. Och dat misst een änneren.

Den Auto soll awer natierlech net komplett verschwannen. Besonnesch fir Leit mat spezielle Besoinen. Als Gesellschaft misste mer an Zukunft einfach dohinner kommen, dass den Auto kee Luxus méi ass, deen erstriewenswäert ass, dofir awer Zäit ze hunn, fir déi wichteg Saachen am Liewen. D'Aktivistin wéilt och net, dass d'Leit vun haut op muer hiren Auto ofschafen, mä einfach an hirer Fräizäit och emol Alternative probéieren. Zum Beispill de Weekend, wann ee méi Zäit huet, einfach emol an e Bus oder an den Tram klammen, einfach ausprobéieren, sou d'Katja Diehl.

Invité vun der Redaktioun: Katja Diehl

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.