En Donneschdeg de Moie war d'Presidentin vun der Lëtzebuerger Associatioun vun den Infirmièren eis Invitée vun der Redaktioun.

Et gëtt eng akut Penurie beim Fleegepersonal an ëmmer méi Leit verloossen de Beruff. Firwat? Dat huet d'ANIL, d'Associatioun vun den Infirmièren an Infirmieren, zesumme mat der Uni Lëtzebuerg an der Etüd LëtzCare analyséiert. D'Etüd gëtt en Donneschdeg am Laf vum Mëtteg publizéiert a presentéiert.

Den Zäitdrock, also ze vill Aarbecht an ze wéineg Zäit, verbonne mat enger grousser emotionaler Belaaschtung, wieren d'Grënn, déi derzou féieren. An dofir misst sech eppes änneren. Dat fuerdert d'Presidentin vun der ANIL, d'Anne-Marie Hanff. Si war en Donneschdeg de Moien eis Invitée vun der Redaktioun.

Invité vun der Redaktioun: Anne-Marie Hanff

Zwee Drëttel vu Fleegepersonal ginn aktuell aus dem Ausland rekrutéiert an 42 Prozent gi bis 2034 an d'Pensioun. Donieft géing een elo an der Etüd gesinn, dass 70 Prozent vum Fleegepersonal op d'mannst eng Kéier am Laf vum leschte Joer driwwer nogeduecht huet, den Job ze verloossen.

Och dat féiert dozou, dass et akut u Personal feelt. Duerch d'Pandemie hätt sech d'Situatioun nach verschlëmmert. Nach méi Zäitdrock, méi Leit, déi selwer krank waren, an Diskussioune ronderëm d'Impfflicht hätten zu vill Spannunge gefouert an hätten d'Fleegepersonal nohalteg gepräägt.

Een Appell war et dohier un d'Direktioune vun de Spideeler, fir d'Infirmieren an hirer Aarbecht ze entlaaschten, virun allem am administrative Beräich, fir dass se sech op dat Essentiellt kënne konzentréieren. D'Digitaliséierung kéint do definitiv Entlaaschtung schafen.

Och d'Attributioune missten iwwerschafft ginn, also dat wat d'Infirmière dierf maache mat an ouni Ordonnance vum Dokter. An der Nuecht géing dat net dacks net fonctionéieren. Dann muss d'Infirmière eppes op Ordonnance vum Dokter maachen, mee den ass net do oder net erreechbar. Dat géing fir eng grouss emotional Belaaschtung suergen.

Um Gesondheetsdësch missten all d'Propositioune fir Verbesserungen diskutéiert ginn, déi dann an eng koherent Strategie afléissen, sou nach eng Fuerderung un d’Santé. Och d'Positioun vum "Chief Nursing Officer", déi 2020 agefouert gouf, soll ausgedeent ginn, eventuell op eng ganz Divisioun. Déi Leit kéinten dann an de Verwaltungsréit vu Gesondheetsariichtunge sëtzen an do un strategeschen Decisioune matwierken.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.