E Freideg de Moie war den Direkter vum Bachelor an der Medezin op der Uni.lu eisen Invité vun der Redaktioun.

"Et besteet eng Hoffnung, dass mer eppes kënne bewierken. Soss hätt ech déi Aarbecht net ugeholl", dat sot e Freideg de Moien den Dokter Gilbert Massard, Direkter fir medezinesch Etüden op der Uni Lëtzebuerg, als eisen Invité vun der Redaktioun zu der Hoffnung, datt e Medezinstudium zu Lëtzebuerg eng Léisung fir den aktuelle Manktem un Dokteren hei am Land kéint sinn.

Zanter dësem Joer bitt d'Uni Lëtzebuerg e komplette Bachelor vun dräi Joer plus Spezialisatiounen an der Medecine générale, der Neurologie an der Onkologie un. De Fait, datt ee Spezialisatiounen hätt, wier e gutt Zeechen, datt Leit interesséiert sinn, sech hei am Land ausbilden ze loossen. Reng zueleméisseg ass de Medezinstudium natierlech nëmmen eng vun de Pisten, fir dem Manktem un Dokteren entgéintzewierken.

De Bachelor ass am éischte Joer op 125 Studenten ausgeluecht. Zanter dësem Wantersemester ginn déi dräi Bachelorsjoer um Belval enseignéiert. Am leschte Joer sinn den Ament 13 Studenten ageschriwwen, déi am Juni d'nächst Joer hiren Diplom kréien. Am zweete Joer sinn et der 32. Dat wieren der onerwaart vill, sou den Dokter Massard. D'Méiglechkeet, fir direkt am zweete Joer an d'Ausland ze goen, besteet awer weiderhin.

"Et ass eng vun den Aufgabe vun der Uni, datt méi jonk Dokteren zréck op Lëtzebuerg kommen"

Et hätt een awer duerchaus hei am Land eng ganz Rei interessant Argumenter, déi fir e Bachelor an der Medezin hei am Land schwätze géifen. D'Klasse wiere bedeitend méi kleng. Doduerch wier vill méi Interaktioun tëscht Enseignanten a Studente méiglech an et hätt een och verstäerkt a Simulatiounstraining investéiert.

D'Studente géifen donieft vergläichsweis fréi a Stagë geschéckt ginn, an eng Praxis, respektiv e Spidol. Et géif een och hoffen, datt doduerch vläicht méi jonk Dokteren duerno nees zréck an d'Land kommen, well se d'Spideeler an Doktere scho kennegeléiert hunn. Dat wier jo och eng vun den Aufgabe vun der Uni.

Master an der Medezin net fir haut a muer

Den Direkter fir déi medezinesch Etüden op der Uni.lu weess natierlech, datt och mat engem Bachelor an der Medezin hei am Land vill jonken Dokteren nach ëmmer wäerten un d'Ausland verluer goen. De Gilbert Massard huet dowéinst nach ëmmer, wéi e sot, "déi heemlech Hoffnung", datt d'Uni Lëtzebuerg de Studiegang an Zukunft op Masterniveau ausbaut.

Fir den Ament ass dat allerdéngs nach Zukunftsmusek. Ier e Master an der Medezin hei am Land agefouert gëtt, misst fir d'éischt eng onofhängeg Evaluatioun vum Bachelor gemaach ginn. Et hätt ee festgehalen, datt ee fir d'éischt emol zwou komplett Bachelor-Ofschlëss géif duerchlafe loossen, ier een eventuell méi wäit geet. D'Uni misst fir d'éischt awer beweisen, datt se d'Kapazitéiten huet, fir méi wäit ze goen. D'Moyenen duerfir hätt een dem Gilbert Massard no elo schonn.

Fir Studenten zréck op Lëtzebuerg ze kréien, kéint een och ganz aktiv virgoen, sou nach eisen Invité vun der Redaktioun. Et misst ee besonnesch méi systematesch op déi Dokteren duergoen, déi kuerz virun hirem Ofschloss am Ausland stinn, a se zréck op Lëtzebuerg lackelen.

Invité vun der Redaktioun: Dr. Gilbert Massard

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.