Dat sot de fréiere Familljeminister an CSV-Deputéierten e Méindeg de Moien als eisen Invité vun der Redaktioun.

Mir féieren e Präisdeckel bei Elektresch a Gas an. Et ginn awer och vill Leit, déi mat Masutt an Holz hëtzen an och do missten nach Hëllefe an Adaptatioune kommen. Dat huet den CSV-Deputéierte Marc Spautz e Méindeg de Moie gefuerdert. Hie war eisen Invité vun der Redaktioun. Am Soziale misst awer allgemeng méi geschéien. Ganzer 47 Prozent vum Staatsbudget géingen a sozial Mesurë fléissen, dat sot de Premier an der Ried zur Lag vun der Natioun. Ma fir de Marc Spautz géing a ville Fäll net geziilt genuch gehollef ginn. Iwwer 109.000 Leit géifen nämlech un der Aarmutsgrenz liewen an zum Beispill wier déi annoncéiert Mesure, fir d'Personal an den Offices sociaux ze verduebelen, e vergëfte Kaddo. Méi Personal eleng géif nämlech net duergoen. Een Office social zu Esch wier net d'nämmlecht wéi een Office social am Capellener Kanton. Et misst ee genee kucken, firwat d'Leit an Aarmut liewen an dann Adaptatioune maache jee no sozialer Struktur vun der Gemeng.

Donieft kritiséiert de Marc Spautz déi Gratuitéitsmesurë wéi zum Beispill  gratis ëffentlechen Transport a gratis Iessen an de Schoulen. Dat géing vläicht am Süden an am Zentrum gutt fonctionéieren, ma soubal ee géing aus dem ländleche Raum kommen, géing et scho net klappen. D'Regierung misst ophalen ze mengen, dass mat Gratuitéit all d'Problemer geléist wieren. Allgemeng vermësst de fréiere Familljeminister Marc Spautz och déi sozial Selektivitéit. Hei géif mat der Strenz gefuer ginn.

D'CSV fuerdert donieft weiderhin eng Steierreform an e méi héije Spëtzesteiersaz vu 45 Prozent. De Käschtepunkt wier e Pak vun 900 Milliounen Euro an deen hätt och an alle Gremien vun der CSV Zoustëmmung kritt, sou den Invité. Fir eng besser Work-Life-Balance fuerdert den Deputéierten iwwerdeems eng "Ofschalt-Garantie", dass een net 24 Stonnen op 24 erreechbar sinn a gläichzäiteg eng Diskussioun iwwer d'Aarbechtszäitorganisatioun, wou d'Politik misst de Kader setzen.

Invité vun der Redaktioun: Marc Spautz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.