E Mëttwoch de Moie war den LSAP-Politiker a fréiere Minister eisen Invité vun der Redaktioun.

Trotz Kris dierft sech Lëtzebuerg net ze vill verschëlden. Um Maximum vun 30% vum PIB misst een net mordikus festhalen. D'Scholde kéinte sech och bei 35% apendelen. Dat sot den LSAP-Politiker Alex Bodry am RTL-Interview, fréiere Minister an Deputéierten an Ex-Parteipresident.

An der LSAP hätt hie sech nach ëmmer fir eng virsiichteg Finanz- a Budgetspolitik agesat. Et wär awer wichteg, datt a schwieregen Zäiten de Leit gehollef gëtt. Datt elo eppes fir d'Elengerzéier gemaach gëtt a villäicht spéider méi, wann d'Situatioun et erlaabt, nennt hie "vernënfteg". D'Hëllefe fir Leit a Betriber aus der Tripartite wären ze begréissen. Och wann hie perséinlech eng Deckelung vun den Energiepräisser gekoppelt un de Konsum besser gesinn hätt, wier hien immens frou, datt de Lëtzebuerger Modell funktionéiert. Et wär och richteg, d'Steierreform bei de Walen ze thematiséieren. Eng geziilt Steierpolitik misst kommen, déi sozial ausgeriicht ass.

Den Alex Bodry ass jo zanter 2020 Member vum Staatsrot. Hien twittert a kommentéiert awer nach ëmmer gären – a sengem perséinlechen Numm - déi politesch Aktualitéit. De Staatsrot wier e Gremium, deen d'Qualitéit vun de Gesetzer géif kontrolléieren. De Conseil d'Etat wier politesch zesummegesat, géif awer net politesch funktionéieren. D'Texter géife Wuert fir Wuert a Saz fir Saz gekuckt ginn. Eng Aarbecht, déi an der Chamber e bësse géif ze kuerz kommen.

Op déi nächst Walen ugeschwat, sot den Alex Bodry, datt hie sech d'Paulette Lenert als LSAP-Spëtzekandidatin géif wënschen. Si wier e Glécksfall fir d'Partei. Hätt de Charme vun enger Quereinsteigerin. Dat hätt een nach net gehat, datt een an engem Joer vun 0 op 1 an de Sondagë geklomme wär. Mat gudde Wäerter bei Popularitéit a Sympathie.

Invité vun der Redaktioun: Alex Bodry

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.