E Méindeg de Moie war den neie President vun der Fédération des Jeunes Dirigieants de Luxembourg eisen Invité vun der Redaktioun.

Jonk Dirigeanten aus alle Wirtschaftsberäicher zesumme bréngen, fir sech auszetauschen, well mer hunn déi selwecht Problemer. Dat sot den Antoine Clasen e Méindeg de Moien. Den neie President vun vun der Fédération des Jeunes Dirigents de Luxembourg war eisen Invité vun der Redaktioun.

Et hätt ee keng politesch Revendicatiounen, well et wier ee keng Lobby, allerdéngs hätt een awer Iddien, déi ee wéilt un d'Politik viruginn. 600 Membere sinn an der Federatioun. D'Hallschent dovunner Ancienen iwwer 45 Joer a ronn 20 Prozent Fraen. Leider wier den Taux vu Frae representativ fir d'Realitéit an der Ekonomie an deementspriechend nach relativ niddereg, mee et géing een aktiv doru schaffen, méi Fraen ze rekrutéieren. Nächste President géing iwwregens och eng Fra ginn, versprécht den Antoine Clasen.

Am Kontext Waljoer schafft d'Federatioun aktuell a siwen Themeberäicher Iddien aus, dorënner Educatioun, Santé, Cohésion sociale, Ëmwelt oder och nach Kompetitivitéit. Bei de jonken Dirigeanten hei am Land wier virop natierlech déi héich Inflatioun déi gréisst Suerg. Se wär gedriwwen duerch de Krich an der Ukrain, ma och eng Suitte vun der Corona-Kris. D'Rentabilitéit géing erofgoen. Et wier allgemeng eng komesch Situatioun zu Lëtzebuerg: d'Ekonomie géing nach rullen, ma et wéisst een, dass nach eppes géing kommen, besonnesch duerch déi héich Energiepräisser. Vill Betriber misste sech den Ament d'Fro stellen, ob se iwwerhaapt nach produzéieren oder wéi se produzéieren, sou den Antoine Clasen. E weidere Problem: Et ginn ze vill Leit bei de Staat. Den Entrepreneursgeescht misst dofir nach gestäerkt ginn.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.