E Mëttwoch de Moie war de President vum Cercle Artistique du Luxembourg eisen Invité vun der Redaktioun.

De Konschtsecteur kuckt déi aktuell Situatioun mat engem frouen an engem betraffenen An. Engersäits freet een sech driwwer, dass d'Pandemie eriwwer ass an dass nees Expoen a Vernissagen organiséiert ginn. Anerersäits stellen sech och Erausfuerderungen duerch d'Inflatioun, déi d'Käschte klamme loossen. Dat sot de Marc Hostert e Mëttwoch de Moien. De President vum CAL, dem Cercle Artistique du Luxembourg, war eisen Invité vun der Redaktioun.

D'Kulturassisen am Juni fir de Secteur vun der bildender Konscht waren e laangen, awer wichtege Prozess fir ze kucken, wéi een d'Konscht kann anescht opstelle fir d'Zukunft. D'Resultater dovunner sinn dunn an de Kulturentwécklungsplang gefloss an dee gëtt vum Secteur begréisst, erkläert de Marc Hostert. Et géif awer e groussen Ënnerscheed ginn tëscht engem Kulturentwécklungsplang, wou ee festleet wat ee wëll maachen, an enger Kultentwécklungsstrategie, fir déi et Ressourcë braucht. Doru géing ee schaffen, mee et wier wichteg all d'Acteuren "au même titre" mat op de Wee ze huelen an z'ënnerstëtzten, sou den Invité.

D'Fuerderunge vum CAL

Scho viru 6 Joer huet de CAL bei senge Memberen e Sondage gemaach, bei deem erauskoum, dass déi gréisst Besoin'en vun de Kënschtler méi Berodung a Weiderbildung sinn a d'Promouvéiere vu verschiddene Konschtsegmenter wéi der Fotographie an der Skulptur. Un deene Pistë géing aktuell och geschafft ginn. De CAL huet donieft awer och e puer grouss Revendicatiounen, dorënner d'Organisatioun vu sougenannten Künstlernachlässe - also wat mat de Wierker geschitt wann e Kënschtler stierft. Och méi Ausstellungsfläch hei am Land an e Kënschtlerlexikon fir déi bildend Konscht, fir datt ee mol weess, wéi eng Artisten et hei am Land gouf a gëtt, wiere wichteg.

Kritik un der Charte de Déontologie

De President vum CAL huet iwwerdeems d'Charte de Deontologie, déi och een Deel vum Kulturentwécklungsplang ass, ferm kritiséiert. Just 90 vun 120 Kultur-Institutiounen am Land hunn dës bis ewell ënnerschriwwen. Deadline war eigentlech bis Mëtt Oktober. De CAL huet dës net signéiert, aus ganz verschiddene Grënn. Éischtens d'Proportionalitéit: Et kéint een net eng Asbl mat 150.000 Euro gläichsetze mat engem grousse Musée mat 50 Employéen an engem risege Budget. Zweetens géing sech d'Fro stellen, wien da kontrolléiert, dass dës Valeuren aus der Deontologie-Charta och wierklech ëmgesat ginn.

Et hätt een déi Problemer a Bréiwer un de Ministère signaliséiert a bis Enn des Joers hätt een och eng Entrevue mat der Grénger Ministesch Sam Tanson, fir doriwwer ze diskutéieren. Dobäi wéilt een assuréieren, dass de CAL och weiderhin sou ënnerstëtzt gëtt wei bis ewell. Allgemeng géing et am Kultursecteur deelweis un Dialog an Koordinatioun feelen, kritiséiert de Marc Hostert.

Invité vun der Redaktioun: Marc Hostert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.