E Méindeg de Moie war de Vizepresident vun der Associatioun vun de Spidolsdokteren eisen Invité vun der Redaktioun.

D'Dokteren an de Klinicke sinn nach ëmmer engagéiert a maachen hir Aarbecht gären, mee si kommen un hir Limitten an dréien deels op der Felg. Dofir missten d'Aarbechtskonditioune verbessert ginn, dat sot den Dr. Jean Reuter, Vizepresident vun der Associatioun vun de Spidolsdokteren, déi sech gegrënnt huet - nieft enger AMMD Doktesch- an Zänndokteschassociatioun - fir dass d'Uleiesse vun de Spidolsdoktere méi Gehéier fannen.

Keng Dokter-Flucht, allerdéngs e Manktem

Eng Dokter-Flucht, wéi d'AMMD se uprangert, gesäit den Dr. Reuter allerdéngs net. D'Doktere géingen aus dem Spidol demissionéieren, ma an enger liberaler Praxis viruschaffen an deemno dem Lëtzebuerger Gesondheetssecteur erhale bleiwen. Et gëtt allerdéngs e Manktem u Spidolsdokteren, confirméiert den Invité. Dowéinst misst een och ëmmer méi wäit kucke goen, fir der iwwerhaapt nach ze fannen, also wäit iwwert d'Groussregioun eraus. Dofir misst een an Zukunft Moyenen fannen, fir d'Spideeler sou attraktiv ze maachen, dass d'Doktere bleiwen, respektiv dass se iwwerhaapt an d'Spideeler schaffe kommen.

Iwwer d'Schafe vun engem Unisspidol nodenken

Do géing engersäits natierlech déi finanziell Attraktivitéit spillen. Fir e Spidolsdokter kéint een zum Beispill een "coefficient de pénibilité", respektiv een "coefficient de complexité" aféieren. Dat heescht fir de selwechten Akt kréich e Spidolsdokter da méi wéi e liberalen Dokter a senger Praxis, well de Patient am Spidol dacks méi komplex Problemer huet. Anerersäits géing besonnesch déi jonk Generatioun, déi am Ausland an Universitéitsspideeler ausgebilt gouf, d'Multi-Disziplinaritéit sichen, d'Méiglechkeet Recherche ze maachen an och fir implizéiert ze sinn an der Ausbildung vun neien Dokteren. A moyen terme géing d'Associatioun vun de Spidolsdokteren och d'Schafe vun engem Unisspidol begréissen. Besonnesch fir déi medezinesch Ausbildung op der Uni Lëtzebuerg wier een Unisspidol ganz wichteg, sou den Invité.

Keng Konkurrenz tëscht dem Spidol a private Praxissen

De Virage ambulatoire, also dass e Patient moies an d'Spidol kënnt an owes nees erausgeet, géing elo scho gutt fonctionéieren. Mee wann et elo ëm d'Schafe vun extrahospitaliere Strukture geet, wéi zum Beispill déi um Potaschbierg, dann dierft et net zu enger Konkurrenz komme mat de Klinicken. Dat ass d'Angscht vun der Associatioun vun de Spidolsdokteren. Zum Beispill wieren d'lescht Woch an der Zeitung 5 Annoncë gewiescht fir de Rekrutement vu Spezialiste fir den neie Centre médical op der Cloche d'Or. Do géing gelackelt gi mat Annoncë wéi "fräi Aarbechtszäiten", "keng Nuetsdéngschter" an "Weekend fräi" an do géing de Problem leien. Sou kéime keng Doktere méi an d'Spideeler, gëtt den Dr. Jean Reuter ze bedenken. Den Accord, fir d'Garden an Astreinten ze bezuelen, wier an deem Kontext dann och eng wichteg Evolutioun. Dofir misst een der AMMD Merci soen, och wa si net mat ënnerschriwwen hunn. D'Associatioun vun de Spidolsdoktere fuerdert awer, dass d'Tariffer fir d'Nuetsdéngschter missten indexéiert ginn, soss hätt een a 4-5 Joer nees déi selwecht Diskussiounen, erkläert den Dr Jean Reuter.

Invité vun der Redaktioun: Dr. Jean Reuter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.