En Donneschdeg de Moie war d'Presidentin vum Ordre des architectes et des ingénieurs-conseils eis Invitée vun der Redaktioun.

Wéinst der Hausse vun den Zënse géingen d'Leit zécken, fir an Immobilien z'investéieren. Dat géing ee scho spieren, esou d'Presidentin vum Ordre des architectes et des ingénieurs-conseils, d'Michelle Friederici, en Donneschdeg de Moien op RTL. D'Dynamik um Immobiliëmarché wier dann och duerch de Manktem u Matière premièren an u Main d'œuvre gebremst. A Krisenzäite wieren d'Architekte gefuerdert an d'Méikäschte sollen der Presidentin vum OAI natierlech och bezuelt ginn. D'Michelle Friederici ass der Meenung, datt sech déi Haussen awer erkläre loossen.

D'Regierung huet rezent eng Rei Reforme proposéiert, wéi d'Grondsteier, d'Taxen op eidel Terrainen a Wunnengen, d'Loyersgesetz, de Baulandvertrag a Remembrement ministériel. Méi staatlechen Interventionismus am Immobiliëmarché fënnt d'Presidentin vum OAI éischter gutt. Et misst een u ville Schrauwen dréinen. Allerdéngs wier elo net all Mesure gutt. Kritik gouf et jo scho souwuel vun Investisseuren ewéi vu Locatairen, datt d'Reduktioun vum Capital investi an déi nei Koeffizienter d'Proprietäre vun ale Wunnenge favoriséieren, an Investissementer an nei Wunnengen a Locatairen defavoriséieren. Dat wier hir och opgefall, sou d’Michelle Friederici.

Als Member vun der Federatioun vun den intellektuellen Independanten huet si iwwerdeems vun der Politik gefuerdert, datt Jonker, déi sech wëlle lancéieren, méi sollen ënnerstëtzt ginn. Andeems se zum Beispill méi proaktiv doriwwer informéiert ginn, wat se musse maachen, fir hire Beruff kënnen z'exerzéieren. Independante sollen an hiren Aen och verséchert ginn, sou wéi dat fir Salariéen de Fall ass.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.