Den Direkter vun der Handwierkerkummer war um Méindeg den Invité vun der Redaktioun.

Mir mussen dem Absenteismus an den Entreprisen entgéintwierken, deen an de leschten 10 Joer an de Betriber duerch Krankmeldungen ëmmer méi an d'Luucht gaangen ass. Dat sot den Tom Wirion, eisen Invité vun der Redaktioun e Méindeg de Moien.

Den Direkter vun der Chambre des Métiers huet proposéiert, dass een an Zukunft e Karenzdag aféiert, deen net vun der Krankekeess, respektiv vum Patron, bezuelt gëtt, ma vum Salarié selwer. Besonnesch mat der Pandemie wieren d'Krankmeldunge geklommen duerch sougenannt Spezial-Congéen, wéi zum Beispill de Congé pour raisons familiales, de Pappecongé an esou weider. Do géife vill onproduktiv Stonne fir e Betrib beieneekommen. Et géife keng Wonnerléisunge ginn, ma nieft dem Karenzdag proposéiert den Tom Wirion och méi Contrôle médical a Contrôle administratif.

Mam Direkter vun der Chambre des Métiers hu mer och iwwer e 25 Säite laange Pabeier mat 30 Proposen a 7 Domainer en vue vun de Chamberwalen diskutéiert. Domadder wéilt een de politeschen Debat lancéieren. Virop misst een d'Attraktivitéit vum Handwierk stäerken, nei Kompetenze promouvéieren an och e modernen Aarbechtsmarché encouragéieren.

A Punkto Nohaltegkeet wiere sech d'Handwierksbetriber hirer Responsabilitéit bewosst. Si wieren engersäits Acteur vun der ökologescher Transitioun (Stéchwuert: Wäermepompel, Isolatioun asw). Op der anerer Säit wier d'Handwierk Consommateur a géing sech dekarboniséieren, fir energetesch gekuckt méi effikass ze ginn. An do géing een erwaarden, dass d'Betriber méi finanziell ënnerstëtzt ginn.

A Punkto Aarbechtszäite fënnt d'Chambre des Métiers, dass een net just soll un der Reduzéierung schaffen, ma un der Flexibiliséierung. D'Besoinen an de Betriber géinge sech iwwer ee Joer gekuckt änneren an deemno misst ee sech zesumme mam Salarié eens ginn, dass emol no Bedarf méi oder manner geschafft gëtt, esou den Invité.

Invité vun der Redaktioun: Tom Wirion

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.