En Dënschdeg de Moie war de President vum Conseil National des Finances Publiques eisen Invité vun der Redaktioun.

Wann d’Steierbarèmen net un d’Inflatioun ugepasst sinn an d’Paien eropginn, da generéieren déi Paien, esou ewéi et de Moment de Fall ass, méi Recettë fir de Staat. De Conseil national des finances publiques, de CNFP, huet ausgerechent, datt de Staat iwwert d’Besteierung vun den Traitementer a Salairen 1,7 Milliarden Euro manner erakritt hätt, wann d’Barèmen tëscht 2019 an 2026 indexéiert wieren. Déi Sue wieren dann an der Ekonomie bliwwen, sief et ënner Form vum méi Kafkraaft oder Investissementsméiglechkeete fir Betriber. Mä d’Politik misst eben och Choixen treffen, well d'Leit sech jo och Ausgabe wënschen, esou de President vum CNFP de Marc Wagener en Dënschdeg de Moien op RTL Radio Lëtzebuerg.

Op d’Fro, ob d’Regierung nach laanscht eng Upassung vun de Barèmen un d’Inflatioun kéim wann d’nächst Joer 2 bis 3 Indextranchen erfalen, huet de Marc Wagener geäntwert:

"Natierlech, mechanesch gesinn, géifen da Recetten eropgoen, mee et géifen och Depensen eropgoen an iergendwann géing d’Ekonomie sech esou wäit ofschwächen, dass een dat och misst consideréieren".

Wann d’Inflatioun géing héisch bleiwen, da kéimen a sengen Ae weider Appelle vun de Leit a vun de Betriber, fir gehollef ze kréien an dat misst ee jo kënne finanzéieren. Iwwerdeems d’Steierrecetten aktuell duerch d’Inflatioun "gedoppt" sinn, géing eng Verschlechterung "relativ abrupt a relativ staark" kommen, esou nach de President vum CNFP. An zwar wann d’Mesurë vun den Tripartitten sech am Staatsbudget nach ganz néierschloen.

Et sinn also politesch Choixen, déi d’CNFP net wëll kommentéieren. Seng Aufgab ass ze kucken, ob ënnert dem Stréch d’Staatsfinanzen opginn an hei mécht sech de CNFP Suergen. Zwar géing de Budgetsdefizit mëttelfristeg ënnert den 3% vum PIB bleiwen, mee beim aneren Indicateur – dem solde structurel – do géing een d’Ziler vun 2024 un net erfëllen. De Marc Wagener huet deen Indicateur mat enger Metapher erkläert:

"Wann Dir elo eng Pai hutt an Dir kommt iwwert d’Ronnen an engem Mount, wou alles gutt geet, ass dat ee Constat. Wann Dir awer eng Pai hutt, wou de Frigo ka futti fueren an Dir kommt awer iwwert d’Ronnen, dann ass dat nach besser."

Kéint de Staat dann net méi spueren amplaz méi Steieren anzekasséieren? Dem Marc Wagener no géing Spueren dacks falsch duergestallt ginn. Spuere géing net forcement bedeiten, "datt ee mam Hummer draschléit". Souguer a Jore wou d’Ekonomie méi lues dréint, géingen normalerweis méi Suen erakommen. De "Progressiouns-Ryhtmus" vun neien Depense wier mëttelfristeg och virgesinn, sou den Ekonomist. Wann een et géing fäerdegbrénge vun den aktuelle 6 - 7% zousätzlechen Ausgaben d’Joer op éischter 2 – 3% ze kommen, da géing sech dem Marc Wagener no d’Situatioun scho vill verbesseren.

Invité vun der Redaktioun: Marc Wagener

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.