Dat huet d'Danielle Becker-Bauer vum nationale Fraerot e Freideg als eis Invitée vun der Redaktioun erkläert.

Stand en Donneschdeg waren 71 Fraen op enger Waardelëscht, fir an engem Fraenhaus ënnerdaach ze kommen. Dat sinn der 71 ze vill, sou d'Danielle Becker-Bauer vum nationale Fraerot. Si war e Freideg de Moien am Kader vun der sougenannter "Orange Week", enger Campagne vun der UNO, fir op Gewalt géintiwwer Fraen opmierksam ze maachen, eis Invitée vun der Redaktioun. Den Ament kann also net all Fra an enger Noutsituatioun gehollef kréien, wa se doheem Gewalt ausgesat ass.

Fraenhaiser sinn am Prinzip als Kriseninterventiounszentrum geduecht, fir Leit an Nout akut ze hëllefen. Déi ugespaant Situatioun um Wunnengsmaart bedéngt awer, datt vill Fraen um reguläre Marché keng Wunneng fannen an dowéinst méi laang am Fraenhaus bleiwen, wéi et u sech virgesinn ass. An der Theorie soll en Openthalt an engem Fraenhaus op 4 Méint limitéiert sinn. An der Realitéit géife Fraen awer iwwert ee Joer am Fraenhaus bleiwen, sou d'Danielle Becker-Bauer. Heiansdo souguer nach méi laang. An akuten Noutfäll géif et da virkommen, datt Fraen temporär och alt mussen an Hoteller ënnerbruecht ginn.

Der Vetriederin vum Fraerot no ass déi aktuell Situatioun awer sécher eng Hemmschwell fir Fraen, fir de Schratt ze maachen an doheem ze goen, wa se net sécher kënne sinn, an engem Fraenhaus ënnerdaach ze kommen. Jidderee wier sech och där Problematik bewosst, mä et wier extrem schwiereg déi néideg Wunnengen ze fannen, déi gebraucht ginn.

Zëmmeren an de Fraenhaiser z'erweideren, wier mol dat, mä ëmmer nëmmen eng Symptombekämpfung. Vill méi misste méi Wunnengen am soziale Wunnengsbau konsequent fir concernéiert Frae reservéiert ginn.

Gewalt am Stot stagnéiert op engem héijen Niveau

Zejoert huet d’Police missen iwwer 900 Mol wéinst haislecher Gewalt intervenéieren. Et gouf méi wéi 200 Wegweisungen. D'Zuele ware liicht réckleefeg, mä si géifen op engem héijen Niveau bleiwen. Nach ëmmer géife sech awer och Leit schummen, wa si Affer sinn, fir dat ze denoncéieren, wat hinne geschitt ass. D'Vertriederin vum Fraerot huet an deem Kontext nach emol op de Service Umedo vum Laboratoire National de Santé opmierksam gemaach, un dee sech Affer vu kierperlecher Gewalt onverbindlech riichte kënnen, fir ënnersicht ze ginn an hire Fall opgeholl kënne kréien, ouni datt se mussen direkt eng Plainte maachen, wa se dat net wëllen. Vun dësem Service géif bis elo nach net genuch Gebrauch gemaach ginn.

Nationale Fraerot fir en Aschreiwe vum "Feminizid" an de Code pénal

An der Lescht hu grujeleg Fraemorde vu sech schwätze gedoen. De Conseil national des femmes mécht sech an deem Kontext staark derfir, datt den Terme "Feminizid" méi präzis erfaasst misst ginn an an de Code pénal ageschriwwe ginn. Dat géif dësem Crime en anere Point ginn an de Fraemord géif anescht wouer geholl ginn.

Donieft setzt sech den nationale Fraerot derfir an, datt Sammelkloe missten eng juristesch Basis kréien. Dacks wier et fir déi Betraffen da méi einfach, fir aktiv ze ginn. Grad bei psychologescher Gewalt.

Zanter 6 Joer gëtt et d’Orange Week hei am Land, déi op ëmmer méi e groussen Interessi stéisst. D'Danielle Becker-Bauer begréisst an deem Kontext ausdrécklech, datt sech ëmmer méi Leit och géifen trauen, ëffentlech iwwert d’Thema Gewalt ze schwätzen. E Samschdeg de Moien um 11 Auer ass zu Esch e Solidaritéitsmarsch. Depart ass op der Brillplaz.

Invité vun der Redaktioun: Danielle Becker-Bauer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.