E Mëttwoch de Moie war d'Sonndesfro Thema an der Emissioun "Invité vun der Redaktioun".

D'Partei Fokus ass an der Sonndesfro vun 2,9 op annerhallwe Prozent gefall. Dat géif dru leien, datt een net déi néideg Tribün hätt, well ee weder a Regierung nach an der Chamber wier. Dat sot de Frank Engel am RTL-Interview, de Spriecher vun der Partei a fréieren CSV-President.

Fir eng jonk Partei géife Plaze feelen, wou ee seng Iddie kéint presentéieren. A wéi enge Gemenge Fokus wëll untrieden, wéisst een nach net, nëmmen d'Stad wier sécher. Op alle Fall wier et e schwéieren Exercice, fir Wallëschten zesummenzekréien. Dat géifen och grouss Parteie mierken. Dowéinst wier Fokus och dofir, fir d'Zuel vun de Gemengen drastesch ze reduzéieren.

Och datt Gemengen- a Chamberwalen net op engem Dag gemaach ginn, huet de Frank Engel kritiséiert. Dat wier e verréckten Exercice, bei deem vill Zäit am Walkampf géif verluer goen an dat an engem schwierege Joer.

D'Verloschter vu senger Ex-Partei, der CSV, wollt de Frank Engel net wierklech kommentéieren. Mä d'Zäit vun de grousse Volleksparteie wier eriwwer. Et hätt een elo eng Volleksmajoritéit, déi sech op 3 Parteien opdeelt.

Am allermannste versteet de Frank Engel de Succès vun de Piraten. Hie wéisst nach ëmmer net, woufir si stinn. Just mat Oppositioun géif ee keng éierbar Regierungspartei ginn. Froen a kloen eleng géif net duergoen. Iergendwa missten d'Pirate soen, wat se konkret wéilte maachen.

Invité vun der Redaktioun: Frank Engel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.