Dat Gefill huet de President vun der consultativer Mënscherechtskommissioun, deen e Freideg eisen Invité vun der Redaktioun war.

E Samschdeg ass den internationalen Dag vun de Mënscherechter an d'Lëtzebuerger consultativ Mënscherechtskommissioun feiert hir 22 Joer. Fir dësen Ulass war hire President de Gilbert Pregno e Freideg eisen Invité vun der Redaktioun. Hei am Land géifen d'Mënscherechter zwar méi respektéiert ginn ewéi op anere Plazen, ma d'Politik hätt opgehalen, d'Oueren ze spëtzen.

Invité vun der Redaktioun: Gilbert Pregno

Allgemeng wier d'Situatioun net besser ginn an de leschte Joren, wann ee bedenkt, wat an der Welt alles sou lass ass, sou de Gilbert Pregno. De Respekt vun de Mënscherechter wier a ville Länner keng Prioritéit. Hei am Land géing zwar méi opgepasst ginn. Wat net gutt géing funktionéieren, wier, datt d'Politik "e selektive Gehéierschued" hätt. Déi géing dacks einfach weidermaachen a weidermaachen, ouni heiansdo eng Bestandsopnam ze maachen. De Gilbert Pregno huet d'Coronagesetzer als Beispill genannt, déi dacks séier an onprezis gewiescht wieren. Kritik gouf et och wat Liwwerkettegesetz ugeet, mat deem soll garantéiert ginn, datt d'Produiten déi importéiert ginn, net op Käschte vun de Mënscherechter entstane sinn. Dem Gilbert Pregno no géing d'Regierung hei eng minimalistesch Approche anhuelen. Kritik hat de President vun der consultativer Mënscherechtskommissioun och fir d'Importer vu Gas a Pëtrol aus Länner, wou d'Mënscherechter mat Féiss getrëppelt ginn.

E Sonndeg sinn d'Mënscherechter dann och Sujet an eiser Emissioun Background. Do schwätze mir haaptsächlech iwwert d'Situatioun vu Refugiéen a Migranten. Dat mat Vertrieder vum Roude Kräiz a vun der Asti.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.