E Mëttwoch de Moie war den neie Gehälteraccord vun der Fonction publique an d'Opwäertung vum Handwierk Thema an der Emissioun "Invité vun der Redaktioun".

Ech géing menge Kanner den Ament net roden, en Handwierk ze léieren, dat sot de Mëttwoch de Moien de Christian Turk, de President vun der Amelux, als eisen Invité vun der Redaktioun. D'Associatioun vertrëtt zanter Februar d'Meeschteren am Enseignement a setzt sech notamment fir eng generell Opwäertung vun den Diplomer am Handwierk an. Den Ament géif et nämlech u Wäertschätzung feelen.

Vun der annoncéierter Unerkennung vum Meeschter am neie Gehälteraccord beim Staat kéinte sech déi Jonk näischt kafen, esou eisen Invité. Wann een eppes mécht, da misst een et global maachen.

D'Amelux fuerdert konkret, fir de Meeschter op Bachelorniveau ze hiewen an den DAP, also de Gesellebréif, un d'Première ze adaptéieren. Duerfir sollt déi Formatioun ëm ee Joer op 4 Joer verlängert ginn.

Konkret kéint een dann dat éischt Semester vun där Formatioun derfir benotzen, fir de Jonken d'Chance ze ginn, déi verschidden Debouchéen, déi et am Handwierk gëtt, an d'Beruffswelt mol kennenzeléieren, ier ee sech op eng konkret Ausbildung festleet. Den Ament géife vill Schüler Enn dës Joers ewechfalen, well se op eemol mierken, datt hir Beruffswiel guer net deem entsprécht, wat si sech drënner virgestallt hunn. Mat enger verlängerter Formatioun kéint een deem Decrochage entgéintwierken, dovunner ass d'Amelux iwwerzeegt.

"De Claude Meisch mécht näischt an der Formation professionnelle"

De Christian Turk huet de Mëttwoch de Moie bedauert, datt d'Politik am Beräich vun der Formation professionnelle net géif nolauschteren.

Et géif kee konstruktiven Dialog mam Educatiounsminister ginn. Den Energie- an den Ëmweltministère wieren an hirer Agenda blockéiert, well den Educatiounsminister näischt Richteges géif an der Beruffsausbildung maachen, sou den Invité. Dobäi kéint ee sécherlech zesummen op e gemeinsaamt Zil hischaffen. Duerfir misst den Educatiounsminister d'Amelux awer fir d'éischt emol empfänken.

D'Amelux stéiert sech an der Beruffsausbildung ënnert anerem un den deels largë Promotiounskrittären. Den Echec géif zanter 2019 kënschtlech niddreg gehale ginn, andeems Jonker och mat 20 vu 60 weiderkommen. Dat misst nees réckgängeg gemaach ginn. Donieft misst ee besonnesch bei méi schwaache Schüler besser bei der Orientéierung oppassen an d'Accès-Krittäre fir verschidde Formatiounen adaptéiert ginn.

"D'Handwierker hunn eng drop"

Duerch eng Opwäertung vun den Diplomer, dovunner ass d'Amelux iwwerzeegt, géif och d'Unerkennung vun den Handwierker an der Gesellschaft an d'Luucht goen. D'Patronat géif deen Ament déi Jonk dann och bestëmmt deementspriechend méi bezuelen, sou de Christian Turk.

Et wier och net sou, datt ee keen Nowuess am Handwierk hei am Land hätt. Et géife pro Joer 5.000-6.000 Schüler a Schülerinnen duerch d'Formation professionnelle goen. Déi misst een anstänneg forméieren. Da wier de Match scho gemaach.

Invité vun der Redaktioun: Christian Turk

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.