Dat seet de CSV-Europadeputéierten an der Emissioun "Invité vun der Redaktioun". E weidert Thema war d'Chamberwalen dat nächst Joer.

"Eng Schan" respektiv "eng schlecht Episod vun House of Cards" - esou beschreift den CSV-Europadeputéierte Christophe Hansen den aktuelle Korruptiounsskandal duerch deen d'Europaparlament zanter enger Woch béis u Glafwierdegkeet agebéisst huet. Déi belsch Autoritéiten hu bekanntlech leschte Freideg sechs Persoune wéinst dem Verdacht op Korruptioun a Geldwäsch festgeholl. Dorënner eng Vizepresidentin vum Europaparlament, d'Sozialdemokratin Eva Kaili aus Griicheland. Ënnert anerem si soll Sue vum Katar an dem Marokko ugeholl hunn, fir deene Länner hir politesch Interessien ze vertrieden. Hire Partner, deen och viséiert ass, huet d'Faiten en Donneschdeg zouginn. Duerch déi ganz Korruptiounsaffär, an där et ëm Montante vun 1,5 Milliounen Euro geet, géif dat ganzt europäescht Parlament, déi ganz EU an dat selwecht Dëppe geheit gi wéi vereenzelt Krimineller. D'Credibilitéit wier fort. Wéi soll d'EU dem Viktor Orban do Reprochë maachen a Saache Rechtsstaatlechkeet? Déi Fro stellt sech de Christophe Hansen.

Als ee vun de Quästorë vum Europaparlament ass den CSV-Deputéierten och Member vun der Presidence vum Europaparlament. D'Eva Kaili huet hien als engagéiert jonk Fra beschriwwen, déi awer liicht naiv gewiescht wier. Dat wier wuel och hire Schwaachpunkt gewiescht.

Lacunne beim Transparenzregëster behiewen

No de Revelatiounen huet d'Europaparlament sech ganz determinéiert gewisen, an der Hoffnung, déi verluere Credibilitéit nees zréckzegewannen. Dat dierft awer nach e laange Wee sinn. D'Eva Kaili gouf als Vizepresidentin ofgesat an en Donneschdeg huet d'Parlament mat grousser Majoritéit eng Resolutioun ugeholl, fir ënnert anerem déi aktuell Transparenzreegelen ze verschäerfen. Vertrieder aus Drëttstaate soll an den Transparenzregëster mat erageholl ginn. Bis elo ass dat nach net de Fall. All Ofstëmmungen, déi de Katar concernéieren, gi fir eng onbestëmmten Zäit op Äis geluecht. Donieft soll ënnert anerem eng Ethikkommissioun geschaaft ginn an eng Enquêtëkommissioun vum Europaparlament de Fall opschaffen, wann d'Justiz hir Aarbecht gemaach huet. Do virdru kéint sech awer schonn eng Spezialkommissioun mam Fall befaassen.

De Christophe Hansen ënnerstëtzt och d'Propos, fir eng Karenzzäit fir Deputéiert anzeféieren, nom Enn vun hirem Mandat.

Christophe Hansen wier prett, fir CSV-Spëtzekandidat am Norden ze ginn

Als Co-Generalsekretär wäert de Christophe Hansen dat anert Joer virun allem mat der Organisatioun vun der Walcampagne vun de Chrëschtlechsoziale beschäftegt sinn. Dës Woch gouf bekannt, datt de konservative Politiker säi kommunalpolitescht Mandat zu Wanseler néierleet, well seng Famill plënnert. 2023 wäert den CSV-Politiker och net méi mat an d'Gemengewale goen. Duerfir awer an d'Chamberwalen am Oktober. Sollt seng Partei dat wëllen, da wier hien och prett, fir Spëtzekandidat am Norden ze ginn, sot hie bei eis op der Antenn.

Ob hien och als nationale Spëtzekandidat kéint untrieden, huet den aktuellen Europapolitiker opstoe gelooss. Hien hätt déi Iwwerleeung bis elo nach net gemaach. Intern wier dat och nach net de Fall gewiescht.

Invité vun der Redaktioun Christophe Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.