E Méindeg de Moien hu mer an der Emissioun "Invité vun der Redaktioun" e Réck- an Ausbléck iwwert déi wirtschaftlech Situatioun am Land gemaach.

Déi héich Energiepräisser bleiwen och d'nächst Joer e Problem. Dowéinst ginn d'Hëllefe fir Betriber nach weider opgemaach. Dat sot de LSAP-Wirtschaftsminister e Méindeg de Moien. De Franz Fayot war eisen Invité vun der Redaktioun. De Minister géing dës Woch nach mat de Propose fir nei Hëllefen an d'Chamber goen. Dat wär immens wichteg, well och 2023 vill Betriber nei Kontrakter fir d'Energieversuergung missten ofschléissen, déi ferm wäerten an d'Geld schloen.

Wéi geet et weider? Villes géif vun Inflatioun, Ukrain-Krich a Geldpolitik ofhänken. Wann eng drëtt Indextranche kéim, misst d'Tripartite op alle Fall nees zesummekommen an dofir géing ee sech och ëmmer den néidege finanzielle Sputt ginn, sou de Franz Fayot. Mat den Tripartitten hätt een et fäerdegbruecht, d'Inflatioun méi niddereg ze hale wéi am Rescht vun Europa. Mam Präisdeckel op der Energie wier d'Inflatioun erofgedréckt ginn an dat hätt och Repercussiounen op aner Präisser a wier allgemeng de richtege Schratt gewiescht. Och de Wirtschaftswuesstem wäert mol op d'mannst d'nächst Joer an 2024 däitlech niddreg bleiwen an dat wier kee gutt wirtschaftlecht Ëmfeld.

Och d'Wale goufen ugeschwat. "Ech géing natierlech ganz gäre mam Paulette Lenert am Duo Spëtzekandidat am Zentrum ginn, mee dat ass mengen ech nach net decidéiert", sou de Franz Fayot. D'Gesondheetsministesch hätt schonn e puer Mol gesot, dass se éischter eng Präferenz hätt fir am Oste matzegoen, mee dat wier nach net entscheet. Den LSAP-Politiker Fayot wier awer motivéiert fir am Zentrum mat an d'Walen ze goen.

D'Liwwerkettegesetz war e weidere Sujet. Den europäeschen Text vu Bréissel wier do an dee wéilt een och eent zu eent ëmsetzen. Dorunner géif Ministèren-iwwergräifend geschafft ginn. Et wier wichteg, datt Betriber d'Mënscherechter, ma och héich Ëmwelt- a Sozialstandarde respektéieren, sou de Wirtschafts- a Kooperatiounsminister.

Invité vun der Redaktioun: Franz Fayot

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.