E Mëttwoch de Moie war de Jugendschutz a seng Reform Thema an der Emissioun "Invité vun der Redaktioun".

Zanter iwwer 30 Joer gëtt un enger Reform vum Jugendschutz geschafft. Déi Gesetzprojeten, déi elo virleien, gefalen der Justiz net. Beim Jugendschutz soll d’Justiz gréisstendeels erausgehale ginn. Dat huet d’Maître Nathalie Barthélémy um Mëttwoch de Moie kritiséiert. D’Affekotin a Presidentin vun der Kommissioun fir Familljerecht vum Barreau, dee rezent dat geplangtent Jugendschutzgesetz aviséiert huet, war eis Invitée vun der Redaktioun.

De Barreau ass – anescht wéi de Parquet – mat der Trennung vu Jugendschutz a Jugendstrofrecht averstanen. Lëtzebuerg gëtt international scho laang dowéinst kritiséiert an ass dat eenzegt europäescht Land, dat déi Trennung nach net huet.

Den ONE, den Office National de l'Enfance, also den nationale Kannerbüro – soll vill méi ze soe kréien. Mat der Famill a mam Kand zesumme solle fräiwëlleg Léisunge gesicht ginn. Eréischt wann dat net klappt, soll e Riichter an d’Spill kommen. Deen hätt awer näischt méi ze decidéieren, beklot sech de Barreau, a misst dat exekutéieren wat den ONE proposéiert. D'Justiz géif esou an hirer Aarbecht ze vill limitéiert ginn an eng Administratioun ze vill Pouvoir kréien, sou d’Maître Barthélémy um Mëttwoch de Moien.

Den nationale Kannerbüro géif och riskéiere manner neutral an onofhängeg ze sinn, fäerten d’Affekoten. Beim Riichter a Parquet hätt een d'Garantie vun der Onofhängegkeet.

Et kéint och net sinn, datt déi zoustänneg Kommissioun CRIP, déi nei géif geschafe ginn an déi zum Beispill bei enger Urgence misst iwwer d’Wuel vum Kand tranchéieren, just eemol d’Woch zesumme kënnt. Sou steet et aktuell am Text. Sou kéint net séier genuch geschafft a gehollef ginn.

Invité vun der Redaktioun: Nathalie Barthélémy

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.