En Donneschdeg de Moie goung et an der Emissioun "Invité vun der Redaktioun" ëm d'Banken, d'Prêten an d'Zënsen.

Wat d'Zënsen op de Prêten ugeet, misst ee sech d'nächst Joer nach méi waarm undinn, sot de Guy Hoffmann am RTL-Interview en Donneschdeg de Moien. De President vun der Bankenassociatioun ABBL war eisen Invité vun der Redaktioun.

Beim variabelen Taux wier een elo bei 2,5 bis 2,7 %, beim fixe bei 4%. D'nächst Joer misst nach mat bis zu 3 weideren Haussë gerechent ginn. 2024 kéint et dann awer och nees erof goen. Neie Clientë réit de Banker e Mix aus variabelem a fixem Taux.

Wann ee mat den héijen Zënsen d'Inflatioun wëll bekämpfen, géif een awer och d'Ekonomie bekämpfen, well d'Leit manner Suen hunn a manner wëllen investéieren. D'Zuel vun den Immobiliëkreditter wier och an der Baisse, well vill Leit d'Krittären, fir Suen ze léinen, net méi erfëllen, sou de Guy Hoffmann. Nach wär et awer net esou, datt d'Leit hir Prêten net kéinten zréck bezuelen.

D'Situatioun vun de Banke selwer: Do misst ee sech op vill Imprevuen astellen. D'Netto-Resultat wier schonn ëm 13% erof gaangen, well een huet misse Reserve maachen, fir eventuell Risken ze couvréieren.

Wat d'Finanzplaz Lëtzebuerg ugeet, misst d'Politik weider aktiv un der Kompetitivitéit an un der Attraktivitéit schaffen. D'Kompetitivitéit vun engem Land wier méi wéi just héich Salairen, ënnersträicht den ABBL-President. Wann ee wéilt den deierste sinn, missten och déi aner Saache stëmmen. Betriber fanne keng Leit méi. D'Logementskäschte sinn héich, d’Steieren och an d'Aarbechtsrecht vereelzt. An d'Indextranchen géifen d'Ausland ofschrecken.

D'Boergeld war och e Sujet am Gespréich mam ABBL-President. Hie mécht sech keng Suergen, datt dat kéint verschwannen. Mä Sue wäert een ëmmer manner am Guichet vun der Bank kréien, mä just nach iwwert de Bancomat. All déi manuell Operatiounen, déi kaschten, wéilt een automatiséieren an aus de Guicheten eraus kréien. D'Agence wier éischter do fir Berodungen. Dat wär villäicht en trauregen Trend, mä och am Ausland géif et kloer an déi Richtung goen, seet den ABBL-President Guy Hoffmann.

Invité vun der Redaktioun: Guy Hoffmann
Zënsen a Prêten: Wéi geet et virun?
Wéi et aus dem Bankesecteur heescht, wier d'Demande no Prête fir Immobilie staark zeréckgaangen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.