En Dënschdeg de Moie war d'Lëtzebuerger Landwirtschaft an dat ëmstriddent Agrargesetz Thema an der Emissioun "Invité vun der Redaktioun".

2022 war e Joer, dat vun den Extreme markéiert war. D'Käschtesituatioun hätt sech op Niveauen entwéckelt, déi ee virdrun ni kannt hätt an dat wier a verschiddene Secteuren dramatesch. Dat sot den Aloyse Marx den Dënschdeg de Moien als eisen Invité vun der Redaktioun. Hien ass Mëllechbauer a President vum FLB, dem Fräie Lëtzebuerger Bauereverband.

Jee no Produktioun wier d'Situatioun ganz verschidden. Wann een zum Beispill säi Fudder fir d'Véi selwer produzéiert a méi exportéiert, da wär et gutt gelaf. D'Dréchent war e Problem. De Südoste war extrem staark betraff, den Norden e bësse manner. Mä generell hätt een d'Dréchent mat Fudder-Reserve vun zejoert kënne meeschteren. De Klimawandel allgemeng wier eng grouss Erausfuerderung, déi ee misst seriö huelen.

Lëtzebuerg wär vum Buedem hier jo éischter fir déieresch Produktioun predestinéiert. Gras géif wuessen, well do quasi näischt aneres géif wuessen. Op ville Plaze wär de Buedem net gëeegent, fir zum Beispill Geméis unzebauen. Och wann Efforte gemaach ginn, fir méi Geméis unzeplanzen. Mä den Eegebedarf kéint ee mat der lokaler Produktioun net decken.

D'Bauere waren oder si jo och rose wéinst dem geplangten Agrargesetz. Et géif awer elo konstruktiv geschafft a méi dat Ganzt gesi ginn. Et war de Bauere wichteg, datt d'Politik d'Zesummenhäng erkennt an datt esou iwwerluecht a geplangt gëtt. Och méi laangfristeg an iwwer eng Legislaturperiod eraus. Natur- an Ëmweltschutz wär e grousst Thema am Secteur. D'Gréisst géif awer net aussoen, wéi ëmweltfrëndlech e Bauerebetrib ass, mä d'Prozesser. Et bräicht een Daten aus dem Betrib, fir ze wëssen, wéi gutt dee schafft.

Datt besonnesch d'Bio-Landwirtschaft am Land ënner Drock steet wier bedauerlech, mä kee reng Lëtzebuerger Phänomen, seet den FLB-President. D'Leit géifen an Zäite vu manner Kafkraaft manner op Bio zeréckgräifen an dat géif de Bauer direkt spieren.

Invité vun der Redaktioun: Aloyse Marx

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.