Dat seet déi gréng Deputéiert a Presidentin vun der Logementskommissioun an der Chamber als eis Invitée vun der Redaktioun.

Et ass ze laang nogekuckt ginn an de Logement hei am Land ze vill dem fräie Marché iwwerlooss ginn. Dat sot e Mëttwoch de Moien déi gréng Deputéiert Semiray Ahmedova am RTL-Interview. Si ass d’Presidentin vun der Logementskommissioun an der Chamber.

Wat fréier Sozialwunnenge waren, déi si verkaf ginn. An déi géifen elo feelen. De fräie Marché hätt sech an déi falsch Richtung entwéckelt, dofir wier et kruzial, datt déi ëffentlech Hand an abordabel Wunnengen – besonnesch och fir ze lounen- investéiert. D’Krittäre wären esou geännert ginn, datt 70 Prozent vun de Leit um ëffentleche Marché eppes kéinte kafen. D’Informatioun, wat et alles u Méiglechkeeten an Hëllefe gëtt, misst awer verbessert ginn.

Aktuell gëtt jo manner gebaut, manner verkaf a manner Leit kréien e Prêt. Mir haten schonn eng Logementskris, gëtt d’Deputéiert Ahmedova ze bedenken, mir si nach ëmmer dran, an ech hoffen wierklech, datt d’Kris net nach verschäerft gëtt. Et wär een e bëssen am Stau an hoffentlech wäert sech d’Situatioun stabiliséieren an et wäert nees lass goen, hofft déi gréng Politikerin.

D’Reform vum Mietgesetz suergt jo fir Kritik. Et gëtt gefaart, datt manner investéiert gëtt. Elo gëtt mol op d’Avise gewaart. Am Januar oder Februar wäert och an der Logementskommissioun driwwer diskutéiert ginn. An et gëtt nach diskutéiert, sou d’Semiray Ahmedova. Si wéilt net soen, datt den Text esou duerch geet, dat misst een nach kucken. Mä bis ewell hätt et ze vill attraktiv Mesurë gi fir Investisseuren an net fir d’Leit, déi eng Wunneng sichen a bräichten. Dat soll sech änneren. Investéiere wäert sech awer weider rentéieren, sou d’Presidentin vun der parlamentarescher Logementskommissioun

Invité vun der Redaktioun: Semiray Ahmedova

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.