En Donneschdeg de Moie war ënner anerem den Accueil vun den ukrainesche Flüchtlingen Thema an der Emissioun "Invité vun der Redaktioun".

2022 ass e Joer vun onwarscheinlech ville Krisen, och Flüchtlingskrisen. 100 Millioune Leit sinn de Moment op der Flucht. 14 Millioune Mënschen aus der Ukrain, dovunner sinn der e puer Dausend bei eis. D'Strukturen hei am Land si belaascht, sot en Donneschdeg de Moien de Marc Crochet, Generaldirekter vun der Caritas am RTL-Interview. Hie konnt confirméieren, datt et an engem Gebai um Boulevard Konrad Adenauer um Kierchbierg Problemer gouf. Déi wären awer mëttlerweil gréisstendeels behuewen.

Mëtt Dezember hätt ee Flüchtlinge missen an dat onfäerdegt Haus transferéieren – wéinst minus 12 Grad dobaussen a minus 2 an den Zelter. Heizung an Infrastrukture wären nach net fäerdeg gewiescht. Bei 750 Leit wär dat en Challenge. Trotzdeem hätt een dat misse maachen.

Ronn 75% vun de 7.000 disponibele Better an 68 Flüchtlingsstrukture wiere beluecht. Et misst ee vill Kulture laanschtenee kréien. Et wär och ongewinnt, datt Europäer derbäi sinn an déi Leit hätten aner Erwaardungen.

Wéi vill Ukrainer privat bei Leit doheem ënnerkomm sinn, doriwwer hätt hie keng Zuelen, well si ni richteg erfaasst gi wären. Déi Offere waren och dacks zäitlech begrenzt oder et gouf Problemer.

Wat mannerjäreg Flüchtlingen ugeet, do hätt een e Problem zu Lëtzebuerg. Et géifen ëmmer méi onbegleete Mineuren op Lëtzebuerg kommen an et géif net genuch adaptéiert Strukture ginn, beispillsweis Kannerheemer. Kanner sollt ee fir d'éischt als Kanner gesinn an net op de Statut reduzéieren. Op der Areler Strooss hätt een elo rezent missen e Flüchtlingsfoyer fir déi Jugendlech ëmfunktionéieren an op 78 Jonker erop goen. Sou vill Jugendlecher beieneen wär net optimal. Et wär ee bereet, fir mat den Autoritéiten zesummen ze schaffen, fir do Léisungen ze fannen, sou de Marc Crochet.

D'Obdachlosegkeet war och en Thema mam Generaldirekter vun der Caritas. Et géif vill iwwert déi Obdachlos geschwat ginn, mä et misst ee méi mat de Leit schwätzen, fir hir Problemer besser ze verstoen. Et géif och net den typeschen Obdachlose ginn. Hir Zuel géif an d’Luucht goen, ëmmer méi Fraen an och Famille wären op der Strooss.

De Problem ass komplex a gëtt ganz dacks vereinfacht an op de Problem vun der Sécherheet reduzéiert, bedauert de Marc Crochet. Déi kommunal Politik sollt net mat de Problemer eleng gelooss ginn. Déi national Politik wär gefuerdert.

Sozialaarbechter wären och net do, fir Leit ze verdreiwen. Bei Problemer wéi der Stéierung vun der Rou oder Droge wär d'Police gefuerdert. Oder villäicht en "Ordnungsamt", wat een hei net hätt.

Invité vun der Redaktioun: Marc Crochet

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.