En Donneschdeg de Moien war d'Drogenhëllef zu Lëtzebuerg Thema an der Emissioun "Invité vun der Redaktioun".

D'Aarbecht vum Abrigado ass net just dat, wat sech virun der Dier ofspillt. Dobanne géing eng ganz Panoplie u Methoden applizéiert ginn, fir Leit mat schwéieren Drogeproblemer ze hëllefen. D'Chargée de Direction vum Abrigado, d'Claudia Allar, war en Donneschdeg de Moien eis Invitée vun der Redaktioun an huet betount, wéi wichteg et wier, d'Bandbreet vun der Drogenhëllef bekannt ze maachen, fir an der Populatioun méi Akzeptanz ze schafen.

Substitutioun duerch Noutsituatioun séier ëmgesat

An der Pandemie gouf séier reagéiert an e Programm fir d'Substitutioun ass en place gesat ginn. D'Claudia Allar huet ënnerstrach, dass d'Leit an enger ganz schlëmmer Situatioun waren, well duerch déi zoue Grenze bemol vill manner bis guer keng Droge méi verkaf goufen. Och un Iessen huet et gefeelt, well vill Hëllefsstrukture bemol zou waren. Wa net séier gehandelt gi wier, hätt dat dozou gefouert, dass d'Leit zum Deel bal verhéngert wieren.

D'Responsabel vum Abrigado hofft, dass de politesche Wëlle weider esou grouss bleift, wéi dat duerch d'Noutlag vun der Pandemie de Fall war. Et hätt ee Projete séier a geziilt kënnen ëmsetzen, wat och ausserhalb vun enger Kris an der Drogenhëllef wichteg wier.

Den Abrigado géing transparent kommunizéieren, wéi si schaffen, doduerch hätt een d'Gefill dass d'Ouere bei der Politik och op sinn. Zum Beispill hunn d'Infirmieren aus dem Nuetsasyl signaliséiert, dass d'Substitutiounsmedikamenter och am Nuetsfoyer sollten ugebuede ginn. Eng Persoun, déi do schléift a Moies direkt d'Medikamenter kritt, start doduerch vill besser an den Dag. Dat hätt och séier kënnen ëmgesat ginn.

Den Abrigado kritt eng nei Fraeninstitutioun

Et soll dann eng nei Fraeninstitutioun kommen. Obwuel méi Männer wéi Fraen an den Abrigado an an de Nuetsfoyer ginn, deen dozou gehéiert, wier et wichteg, eng Offer fir Fraen ze schafen. Detailer kéinten nach net public gemaach ginn, ma et wier wichteg Fraen, déi sech viru Gewalt musse schützen, mee en Drogeproblem hunn, kënnen opzehuelen an ze encadréieren.

Et géing een um Terrain nämlech mierken, dass Gewalt a Sucht dacks korreléieren, ma fir Fraen déi e Suchtproblem hunn, ginn et aktuell awer ze wéineg Noutstrukturen, wou si kënnen ënnerkommen. Dat soll an der Fraeninstitutioun geschéien, wou verschidde Servicer op enger Plaz zentraliséiert solle ginn.

Regional Strukturen, fir méi fréi anzegräifen

Leit, déi d'Hëllef vum Abrigado an der Stad an Usproch huelen, konsuméiere schonn zanter ville Joren, sinn duerch all Raster gefall a konnte vu kenge soziale Strukturen opgefaange ginn. Dat wier och international an aneren Haaptstied de Fall. En éischte Schrëtt wier et, déi Leit mat individuellen Hëllefsleeschtunge mol ze stabiliséieren. Duerno wier et awer wichteg, dass d'Persoun net eleng gelooss gëtt an et entspriechend aner Programmer gëtt, wat d'Aarbecht oder de Logement ugeet.

Regional muss et dowéinst Beschäftegungs- esou wéi och Wunnméiglechkeete ginn, fir d'Leit och aus der Drogenzeen vun der Haaptstad erauszekréien an nees an engem gewinnten a strukturéiertem Ëmfeld ze encadréieren.

D'Populatioun bréicht sech och keng Suergen ze maachen, dass Strukture wéi den Abrigado mat engem Drogekonsumraum iwwerall am Land an an hirer Noperschaft géinge gebaut ginn, dat wier der Direktesch vum Abrigado no guer net néideg. Vill méi soll an der Drogenhëllef regional mat Leit geschafft ginn, déi nach oder nees méi stabil sinn. A klenge Strukture kéint d'Präventioun, respektiv de Suivi, besser geléngen.

Den Drogekonsum gehéiert an all Gesellschaft dozou, esou nach d'Claudia Allar, dat géing een och hei uechter d’Land an den Ofwaasseranalyse gesinn. D'Fro wier awer, wéi een domadder ëmgeet.

Invité vun der Redactioun: Claudia Allar

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op ass d'Emissioun dono och am Replay ze fannen.