1.000 Wunnenge manner ginn dëst Joer gebaut, d'Joer drop (2024) wier een da bei 50% manner wéi nach d'lescht Joer. Esou d'Prognos vum Jean-Paul Scheuren.

De Privatsecteur huet soss méi wéi 4.000 Unitéiten d'Joer gebaut. Ma wann et u Wunnenge feelt, géing och den Drock um Locatiounsmarché an d'Luucht goen, esou nach de Jean-Paul Scheuren. De President vun der Chambre Immobilière war en Dënschdeg de Moien eisen Invité vun der Redaktioun.

Den Immobiliësecteur misst sech enger neier Situatioun mat villen Onsécherheeten stellen, zum Beispill wat e Projet kascht. Beim Finanzement awer och bei der Konstruktioun. D'Promoteure bräichten an dësen Zäite méi Visibilitéit. Déi géif et den Ament awer net ginn, dowéinst wiere vill Projete gestoppt, respektiv géingen d'Promoteure se zeréck halen.

Den Drock um Locatiounsmarché gëtt méi héich

Dass manner gebaut gëtt, wier net gutt, well d'Demande fir ze wunne wier nach ëmmer do. Ob an der Locatioun oder an der Vente, d'Leit misste jo enzwousch wunnen. Dowéinst géifen d'Immobiliëpräisser och net onbedéngt falen, mengt de President vun der Chambre Immobilière. Do, wou de Jean-Paul Scheuren awer e Problem gesäit, ass dass et u Locatiounswunnenge fir déi feelt, déi am mannsten hunn. Well eben net méi genuch gebaut gëtt, respektiv net genuch Leit investéieren.

Aktuell wier et schwéier iwwer Präisser ze schwätzen. Ma obwuel manner Leit kafe kënnen an d'Demande dowéinst manner grouss ass, sinn d'Präisser och am leschten Trimester vun 2022 geklommen. D'Käschte vum Bau misste jo trotzdeem gedeckt ginn a well d'Indexatioun op de Verkafspräis net previsibel ass, géing de Präis an d'Luucht gesat ginn, fir e fixe Montant kënnen ze garantéieren.

Ëffentlech a privat Hand zesumme géint Logementskris? 

Zesumme mam Staat misst elo no Léisunge gesicht ginn, am Interessi vum Wunnmarché awer och vum Secteur. De President vun der Chambre Immobilière huet bedauert, dass d'Promoteure bei der Fro, wéi een de Logementsmarché kann an de Grëff kréien, net méi agebonne ginn. Wat d'Opkafe vu Logementer, déi d'Promoteure net verkaf kréien, ugeet, esou sot de Jean-Paul Scheuren, dass een och net mat Perte dem Staat kéint Unitéite verkafen. De Logementsministère hat proposéiert, Logementer opzekafen, fir se zum Beispill an déi abordabel Locatioun ze ginn. Beim Präis wier ee sech mat de private Promoteuren awer net eens.

De Jean-Paul Scheuren huet nach annoncéiert, dass d'Chambre Immobilière amgaangen ass eng Demande auszeschaffen, fir e Chômage partiel fir d'Immobilienagencen unzefroen. Dësen ass am Fall vun ekonomesche Schwieregkeeten an engem Secteur virgesinn.

Invité vun der Redaktioun: Jean-Paul Scheuren

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.