E Mëttwoch de Moie waren d'Gripp an de Covid Thema an der Emissioun "Invité vun der Redaktioun".

Et ass nach keng Decisioun gefall. Dat sot den Direkter vun der Santé, den Dr Jean-Claude Schmit e Mëttwoch de Moien als eisen Invité vun der Redaktioun, zu der Fro, ob hien dëst Joer mat an d'Wale geet. Hien huet duerchblécke gelooss, dass Diskussioune géife lafen, mä nach wier näischt sprochräif. Op d'Fro, fir wéi eng Partei hien eventuell géing matgoen, hutt hien och net wëllen äntweren.

Zanter ugangs dëser Woch géingen iwwerdeems Stéchprouwe gemaach gi bei Leit, déi aus China areesen. Entretemps wiere fënnef Leit getest ginn. Et wieren net vill Leit, déi direkt aus China géinge kommen an donieft géing op de grousse Fluchhäfe souwisou scho kontrolléiert ginn an deementspriechend wier Lëtzebuerg mat geschützt, well keng Direkt-Passagéier-Flich aus China um Findel landen.

Pic vun der Gripp

Wat déi ablécklech Gesondheetssituatioun am Land ugeet, hätt een an der Woch virun de Chrëschtdeeg e Pic mat 2.500 Grippefäll erreecht. Zanterhier géingen d'Zuelen erofgoen. Dat léich natierlech och dorunner, dass d'Schoulen zou waren an, dass d'Leit Congé haten a méi doheem waren: Dofir misst een elo kucken, ob nach eng 2. Well nokënnt.

Wat de Covid ugeet, misst een effektiv elo am Januar/Februar driwwer nodenken, fir an de Spideeler nees zu enger normaler Situatioun zeréckzekommen, also ouni Covid-Filièren an den Urgencen. Dës haten iwwer d'Feierdeeg natierlech fir zolitte Stau a laang Waardezäite gesuergt, well bei ville Leit mat Otemproblemer net kloer war, ob et wéinst Corona oder wéinst der Gripp war.

Ganz sympathesch fënnt de Jean-Claude Schmit dann d'Iddi vun engem skandinavesche Gesondheetssystem. Dat wier eng interessant Diskussioun, déi awer och Contrainte géif mat sech bréngen. Et wiere Reflexiounen amgaange wéi een d'Soins primaires, also d'Generaliste kéint nei organiséieren. D'Digitalisatioun géif do eng ganz wichteg Roll spillen.

Manktem u Medikamenter ass weltwäit e Problem

Op d'Kritik vum LCGB, dass zu Lëtzebuerg permanent e Problem wier, wéinst engem Manktem u verschiddene Medikamenter, äntwert den Direkter vun der Santé, dass dat een europäeschen, voir souguer e weltwäite Problem wier.  D'Produzente géifen einfach aktuell net méi nokommen, och well si selwer Problemer hunn, fir Matières premières erbäizekréien.

Wat nei Medikamenter ugeet, do wier et esou, dass eng gewësse Prozedur virgesi wier, iert dës op de Marché kommen an dat géing Zäit kaschten. Allerdéngs kéinten d'Dokteren ëmmer Exceptiounen ufroen. D'Leit missten also net an d'Ausland goen, dat wier eng falsch Informatioun vum LCGB.

Invité vun der Redaktioun: Dr. Jean-Claude Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.