D'Isabelle Schlesser, Directrice vun der Adem, huet e Freideg de Moien de Point iwwert d'Situatioun um Lëtzebuerger Aarbechtsmaart gemaach.

Déiwe Chômage am November, jo, mä wann een e bëssen an den Detail kucke geet, gesäit een, dass et net méi grad sou positiv ass, wéi nach déi Méint virdrun, sou d'Isabelle Schlesser e Freideg de Moien. D'Directrice vun der Adem war eis Invitée vun der Redaktioun. Et hätt ee méi Aschreiwunge vu Leit, déi no enger Aarbecht sichen an manner Offeren, wéi elo nach zejoert. Dat géing weisen, dass d'Situatioun um nationalen Aarbechtsmarché an den nächsten Méint entweder stabel bleift oder sech lues a lues verschlechtert. Et kéint een awer net vun enger rapider Verschlechterung schwätzen, sou d'Invitée.

Dës Evolutioun kéint een am beschten am Bau-Secteur observéieren. Am November hätt ee 500 oppe Plazen gehat, dat wieren 42% manner, wéi nach Enn Mäerz. Keen anere Secteur wier den Zuele vun der Adem no sou frappant betraff. Am Commerce géing een och eng Baisse gesi vun 40 Prozent (par Rapport zum Juni 2022) bei de gemellte Plazen am Stock vun der Adem. Et misst een awer nuancéieren, et géing jo nach agestallt ginn an a verschiddenen anere Secteure géing d'Demande och an d'Luucht goen. Nach ni hätt een zum Beispill souvill oppe Plazen am IT-Secteur gehat oder am Finanzsecteur an bei de Fongen.  Enn November wieren ëmmerhin nach iwwer 12.000 oppe Plaze bei der Adem gemellt gewiescht, sou d'Isabelle Schlesser.

Wéi antizipéiert een déi negativ Tendenzen?

Domadder géing ee sech all Dag beschäftegen. Mëttelfristeg géing ee sech op d'Verännerungen um Aarbechtsmarché astellen. Verschidde Beruffer géinge verschwannen oder sech staark veränneren an do géing d'Adem agéiere mat Formatiounen, fir, dass d'Leit sech kënne reorientéieren. Personaltechnesch wier een do gutt genuch opgestallt a villes kéint mëttlerweil och digital gemaach ginn.

Invité vun der Redaktioun: Isabelle Schlesser

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.