En Méindeg de Moien goung et an der Emissioun "Invité vun der Redaktioun" ëm d'Erwaardunge vun der KPL am Waljoer 2023.

Och am Joer 2023 braucht et nach eng kommunistesch Partei, well mir géingen an engem Land mat engem kapitalistesche System liewen, dee fundamental ongerecht ass. Och zu Lëtzebuerg ginn déi Räich méi räich an déi Aarm méi aarm an och zu Lëtzebuerg géingen déi grouss Betriber enger Handvoll Aktionäre gehéieren, déi decidéieren, a wéi eng Richtung et geet.

Dat sot den Ali Ruckert e Méindeg de Mueren. De President vun der Kommunistescher Partei Lëtzebuerg war eisen Invité vun der Redaktioun.

Een Drëttel vun de Stéit zu Lëtzebuerg géingen Enn des Mounts d'Enner net beienee kréien. Am Kampf fir eng méi gerecht Gesellschaft bräicht et eng kommunistesch Partei. Ma et bräicht een awer och Partner, wéi zum Beispill d'Gewerkschaften. Natierlech wier den OGBL een "Verbündeten", wéi den Ali Ruckert se genannt huet, well si sech als eenzeg grouss Gewerkschaft agesat hätt, fir d'Manipulatioun vum Index ze verhënneren. Donieft hätt een awer och gutt Kontakter mat der Staatsbeamtegewerkschaft an der Bréifdréieschgewerkschaft. Et géifen och Kontakter mat Déi Lénk ginn, awer éischter seelen. Et hätt een änlech Iddien, ma net déi selwecht.

Gemengen- a Chamberwalen

D'KPL ass den Ament nëmmen zu Déifferdeng an zu Rëmeleng am Gemengen-, respektiv am Schäfferot. Do wéilt een natierlech erëm gewielt ginn. Ma et hätt een sech och als Zil gesat, nees zu Esch an de Gemengerot ze kommen. Natierlech wéilt een och an d'Chamber gewielt ginn, well een do d‘Méiglechkeet hätt seng Iddien engem méi breede Public ze presentéieren. Et géing een och definitiv genuch Leit fannen, fir op déi Lëschte matzegoen. Et wier den Ament allerdéngs net attraktiv genuch fir Jonker, well een och net genuch Moyenen hätt. Dorunner géing awer e Jugendgrupp an der KPL schaffen.

Grad elo wier de Kommunismus nämlech wichteg. De Kapitalismus wier nämlech an enger Dauerkris a net fäeg d'Probleemer a Wirtschaft, Sozialem an Ëmwelt ze léisen. De Kommunismus kéint Piste weisen, wéi et och anescht geet, sou den Ali Ruckert. Zum Beispill mat enger Vergesellschaftung vun de Betriber fir dass de Räichtum net just an e puer Täsche fléisst, mee gerecht verdeelt gëtt, sou de President vun der KPL.

Invité vun der Redaktioun - Ali Ruckert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.