En Dënschdeg de Moie waren de Piraten hir Ziler am Superwaljoer Thema an der Emissioun "Invité vun der Redaktioun".

Mir maachen eis Aarbecht weider wéi déi lescht 4 Joer. Mir sinn nach net opgereegt a ginn de Walkampf cibléiert un. Dat sot de Sven Clement, Deputéierte vun de Piraten am RTL-Interview. Hie war en Dënschdeg de Moien eisen Invité vun der Redaktioun.

Eng Leeder géif d’Gesellschaft brauchen, wou ee kéint eropklammen, net en Trampolin, wéi de Premier et virgezeechent huet. Well um Trampolin géif et nämlech och séier erof goen. Wann een d’Wieder kuckt, wär et och net de Moment fir sech an d’Hängematt ze leeën.

Kloer Wierder hat de Piraten-Deputéierte fir déi geplangte Reform vum Mietgesetz. Et wier eng katastrophal Reform, déi den Henri Kox proposéiert. Al Proprietäre géifen iwwerbevirdeelegt ginn. Locatairen a Vermieter géife géinteneen opbruecht ginn an d’Reform géif kengem wierklech hëllefen. De Piraten no misst een de Leit an der aktueller Situatioun mat den Zënsen hëllefen. De Staat misst massiv Wunnenge kafen an e Konjunkturpak fir de Bausecteur wär néideg.

De Sven Clement huet och eng fundamental Reform vum Steiersystem gefuerdert. D’Steierbelaaschtung hei am Land wär ze héich ginn duerch déi kal Progressioun. D’Steiertabell misst ugepasst ginn, d’Steierkreditter an de ganze Steiersystem missten iwwerschafft ginn. E System, deen an den 30er Joren aus Däitschland importéiert gi wier.

D'Pirate wäerte warscheinlech bei de Gemengewalen a méi Gemenge wéi ugangs geplangt kënnen untrieden. Et hat ee mat 8-10 Gemenge gerechent, mä elo kéint ee warscheinlech (mat de Majorzgemengen) an engen 20 Gemenge kënnen untrieden. Et géif een awer och nach Kandidate sichen.

Bei de Chamberwale wënscht ee sech Fraktiounsstäerkt. Dat wiere 5 Deputéiert. Alles iwwer déi aktuell zwee Sëtz eraus wier awer schonn e Gewënn. Bei 6 Mandater wär ee kloer Walgewënner.

Elo mol géif een d’Regierung kontrolléieren a viru sech hier dreiwen. Mä politesch Programmer kéint een am beschten an der Verantwortung ëmsetzen.

Invité vun der Redaktioun / Sven Clement

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.