En Dënschdeg de Moie war ënnert anerem d'Aarbechtszäitverkierzung Thema an der Emissioun "Invité vun der Redaktioun".

Et ginn den Ament eng ganz Partie Erausfuerderunge fir d'Lëtzebuerger Industrie. Wéi schonn zanter laangem de Mangel u qualifizéierter Aarbechtskraaft, den Index, deen een zwar gestreckt hätt, mee wou elo awer zwou Indextranchen hannerteneen kommen. Dann den Impakt vun der Hausse vum Mindestloun fir Betriber mat niddrege Léin an déi héich Energiekäschten, déi fir verschidde Secteure wierklech dramatesch wieren. Dat sot den Direkter vun der Industriellefederatioun FEDIL. De René Winkin war en Dënschdeg de Moien eisen Invité vun der Redaktioun an zeechent een däischtert Bild vun der aktueller Situatioun.

2023 gëtt e schwéiert Joer

2023 géingen a ville Betriber och nach déi héich Energie-Tariffer dobäikommen. Dofir misst een domat rechnen, dass 2023 een deiert Joer fir d'Betriber gëtt, an déi géingen da struewelen, fir mat de Präishaussen ëmzegoen. Vun hirer Marge kéint dat net erofgoen, erkläert de René Winkin. Si missten also d'Präisser an d'Luucht setzen an hätten dann op de globale Mäert Konkurrenz vu Marchéen, déi dëse Problem net hätten, an déi hir Präisser kéinten niddereg halen.

Wat kann d'Politik dogéint ënnerhuelen? Et bräicht definitiv en neien Design vum europäesche Stroummaart, sou den Direkter vun der FEDIL. Donieft kéint een definitiv méi bëlleg Stroum produzéieren, wéi mir et den Ament maachen. D'Opportunitéiten an déi wirtschaftlech Retombéeën, déi een elo géing schafe mat der digitaler- an der Energie-Transitioun, déi missten eise Betriber an eise Leit zegutt kommen. Besonnesch Europa géing do elo och reagéieren, well zum Beispill d'USA ganz aggressiv op der Schinn ënnerwee wier, sou den René Winkin. Et misst ee sech och Gedanke maachen, wéi et nom 1. Januar 2024 weidergeet, wann aktuell Tripartite-Decisiounen auslafen. Et dierft dann net zu engem grousse Schock fir d'Betriber kommen. Dofir misst wuel am Laf vum Joer egal wéi eng Tripartite beieneekommen. Et wier kloer, dass vill Betriber och iwwer dëst Joer eraus weider misste gehollef kréien.

Et gëtt keen "One-Fits-All"-Modell fir d'Aarbechtszäitverkierzung

Wat eng Aarbechtszäitverkierzung ugeet, gesäit de René Winkin kee Besoin fir dat generell fir iwwer 400.000 Salariéen ëmzesetzen. Nieft der rapider Lounentwécklung, dem Absenteismus an den Energiekäschten déi eropginn, géing sech e Betrib elo d'Fro stellen, ob soss kengem eng besser agefall wier, fir nach eng drop ze setzen?

Och d'Besoine vun de Salariéë wieren extrem verschidden an ze mengen et hätt een de Monopol vun der Äntwert, wat d'Leit brauchen, wier och vermessen. Et wier besser e Kader ze hunn, wou e Salarié en fonction vu senge Besoinen, sengem Alter a senge Familljesituatioun, kéint mam Patron Arrangementer fannen, sou den Direkter vun der FEDIL.

Invité vun der Redaktioun: René Winkin

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.