En Dënschdeg de Moie waren d'Mënscherechter Thema an der Emissioun "Invité vun der Redaktioun".

Déi nächst Regierung muss méi op eis an op aner Mënscherechtler lauschteren, dat sot de Gilbert Pregno am RTL-Interview. Hien ass de President vun der consultativer Mënscherechtskommissioun, der CCDH, a war den Dënschdeg de Moien eisen Invité vun der Redaktioun. D'Politik géif dacks nëmmen dem Avis vum Staatsrot Rechnung droen an déi aner Avise méi oder manner ignoréieren.

A Saache Mënscherechter wär scho vill am Land geschitt, mä et wier awer nach vill Loft no uewen. Zum Beispill bräicht een eng Zort "Ombudsman" fir d'Mënscherechter. De Gilbert Pregno huet elo 10 Joer laang d'Presidence vun der Mënscherechtskommissioun, mécht dat benevole an hält Enn dës Joers op. D'Mënscherechtskommissioun bräicht méi Moyenen.

D'Aarmut mécht dem Gilbert Pregno ganz besonnesch Suergen. En Dënschdeg presentéiert d'Kommissioun hir Prioritéiten en Vue vun de Chamberwalen. D'Parteien kréien déi zougeschéckt.

D'Recht op d'Wunnen steet elo an der neier Verfassung. Dat wier schéin, hätt awer net vill Konsequenzen. Hei wier nach ëmmer d'Politik gefuerdert.

30 Joer, nodeems d'Kannerrechtskonventioun ënnerschriwwe gouf, géif een nach ëmmer op en anstännegt Kanner- a Jugendschutzgesetz waarden. Dat wier, fir sech ze schummen, sou de Gilbert Pregno vun der Mënscherechtskommissioun. Et gouf zeg "oppositions formelles" an den Texter. Déi Texter wären "à la base" net ëmmer gutt geschriwwen, do géif Expertise feelen. Et gouf och vill Widderstänn vun der Magistratur. RTL-Informatiounen no dierften zu de Gesetzer vum Jugendschutz a Jugendstrofrecht am Hierscht Amendementer deposéiert ginn. Si ginn awer net méi an dëser Legislaturperiod gestëmmt.

Invité vun der Redaktioun: Gilbert Pregno

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.