An eiser RTL-Themewoch iwwer d'Gesondheet en Vue vun de Chamberwalen ass de President vun der Spidolsfederatioun eisen Invité vun der Redaktioun.

De Virage ambulatoire ass, wann eng Interventioun am Spidol bannent engem Dag ka geschéien, an mëttlerweil ass dat bei méi wei der Hallschent vun den Admissiounen de Fall. D'Fro no der Versuergung baussent de Spideeler wier eng ganz aner. Do ginn dacks d’Notioune verwiesselt, sot den Dr Phillippe Turk e Freideg de Moien als eisen Invité vun der Redaktioun. De President vun der Spidolsfederatioun FHL huet och vun enger Heresie geschwat, wann ee géing soen, d'Doktere géingen hei am Land entmëndegt ginn, just well se an enger privater Praxis missten un e Spidol reportéieren. Dat war nämlech d‘Kritik virun e puer Deeg vum Dr Gérard Schockmel an eisem Face-à-Face. Och wann den Dokter an der privater Praxis un d'Spidol gebonne wier, hätt een eng absolut "liberté thérapeutique". Den Dokter hätt hei am Land Netto-Honorairen a misst deemno keng Suen un d'Spidol ofginn. Hie kéint Moies an d'Spidol kommen, wou alles prett wier, fir zum Beispill eng Operatioun ze maachen, an d'Klinicke wieren deementspriechend och den Dokteren hire Service Provideren, sou den Invité.

Penurie ass Generatiounsbedéngt

D'Penurie un Doktere géing ee queesch duerch Europa gesinn. Et feelt u Generalisten an un enger ganz Rei Spezialisten. Doduerch géing den Accès fir de Patient ëmmer méi schwéier ginn. Donieft hätt ee 25 Prozent Populatioun bäikritt an de leschten 12 Joer. An et géing ee weider wuessen. Et wier einfach e Capacitéitsproblem. Donieft misst een och thematiséieren, dass et e generatiounsbedéngte Vocatiounsproblem gëtt. Déi Jonk wéilten een aneren Equiliber, méi work-life balance an de Beruff hätt sech och immens feminiséiert. Et géing deemno eng aner Approche ginn, wéi d'Leit bereet wieren, ze schaffen. Brauch et deemno fir all Dokter, deen an d'Pensioun geet, op d'mannst zwee Neier? "Mir sinn warscheinlech net wäit dovun," sou den Invité.

Dierf e Spidol engem Patient Soine refuséieren?

Et kann ee grondsätzlech als Spidol kee Patient refuséieren. Dat do war éischter ee Kommunikatiounsproblem an engem Service, wou een op eemol gesinn huet, dass een et einfach net méi géing packen. Dat sot den Dr Philippe Turk zu dem rezente Incident, wou Leit an engem Spidol Soine refuséiert krute mam Argument et géing ee just nach dréngend Fäll unhuelen. Et kéint een de Leit net Soine refuséieren, ouni hinne op d‘mannst Alternativen ze bidden.

Assisen no de Walen

Queescht duerch d‘Parteiprogrammer liest een de Wonsch no weidere Pläng, fir de Gesondheetssystem besser opzestellen. Allerdéngs gouf et schonn am Virfeld vill Kritik dorunner, dass et zwar x Pläng gëtt, mä um Terrain konkret näischt geschitt. Feelt et do un Gouvernance? Sou richteg op déi Fro äntwere wollt den Dr Philippe Turk net. Hie sot allerdéngs, dass an de leschte Joren net genuch un engem Strang gezu gouf. Et missten och méi Ministère mat agebonne ginn. Donieft misst sech de Gesondheetssecteur méi opmaache fir d‘Recherche, fir d'Start-Uppen a fir déi ekonomesch Aspekter vum System.

Soubal eng nei Koalitioun no de Wale géing stoen, bräicht et op alle Fall direkt eng Zort Assisen, fir d'Gesondheet an do méi konkret bezunn op d'Ressources humaines fir d'Besoinen déi nächst 15 bis 20 Joer ze decken.

Invité Redaktioun - Dr Philippe Turk

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.