D'Ekonomie dréint manner gutt an d'Land wier relativ no un enger Rezessioun. Dat géingen d‘Zuelen vum Statec an der Adem weisen.

Dat géing sech kloer op d'Situatioun um Bau bezéien, mee et misst een oppassen, dass dat net och an aner Beräicher ëmschléit. Och déi international Kompetitioun um Niveau vun der Finanzplaz géing Drock maachen. Dowéinst missten d'Betriber steierlech entlaascht ginn. Dat sot de Jean-Paul Olinger e Méindeg de Moien um RTL-Mikro.

Invité vun der Redaktioun: Jean-Paul Olinger

Fuerderung no enger besserer Steierpolitik

D'Steierpolitik ass d'Präispolitik vum Land. Et kéint een näischt besteieren, wat een net huet an dofir misst ee sech d'Fro stellen, wat een de Leit an de Betriber bitt, déi op Lëtzebuerg kommen. 3 vu 4 Persounen, déi hei am Land schaffen, kommen aus dem Ausland. Et hätt een dat an der Covid-Pandemie gesinn. Wei de Sprit an Däitschland méi bëlleg war, wieren d'Leit an Däitschland tanken gaangen an dat géing een och elo bei de Fonge gesinn. Déi wieren an Irland méi bëlleg an dofir géif Lëtzebuerg een Deel vu senge Fongen a Richtung Irland verléieren. An do misst ee versichen, een Equiliber ze halen.

Schonn haut wieren d'Steieren hei zu Lëtzebuerg fir d'Betriber méi héich wéi am Ausland. Sief et bei der Akommessteier oder eng Verméigenssteier oder d'Taxe d'abonnement, déi et béid am Ausland net ginn. Zu Lëtzebuerg gëtt et e proportionellen Taux fir d'Betribsbesteierung an dee soll een och bäibehalen, mee en dofir awer erofsetzen oder upassen un d'Moyenne vun der EU oder der OECD. Den Taux wier an der Geschicht erofgaangen an dat hätt deemools Betriber an d'Land bruecht an Aarbechtsplazen geschaaft, sou den Jean-Paul Olinger.

Aarbechtszäitverkierzung an Index

D'Aarbechtszäitverkierzung ass eng rout Linn fir d'UEL. Zu Lëtzebuerg géif, am EU-Verglach, wéineg geschafft ginn. Just an der Belsch, a Frankräich an a Slowenien géing nach manner geschafft ginn. Dowéinst ass d'UEL géint eng Verkierzung, mee fir eng Flexibiliséierung. Och den Index ass fir d'Patronat e rout Duch. Den Index wier wichteg fir de soziale Fridden, mee net all Paie misst indexéiert ginn. D'Betriber wieren net responsabel fir déi héich Inflatioun, missten awer de Gros vun de Méikäschten droen. An dem Sënn wier den Index eng verstoppte Steier.
D'Patronats-Vertriedung gëtt keng Walrecommandatioun. Géif sech awer éischter an den Programmer vun DP an CSV erëmfannen. Mat der LSAP géing ee punkto Aarbechtszäitverkierzung an Index natierlech net op enger Linn leien an och d'LSAP-Propos fir eng Verméigenssteier anzeféieren oder de Spëtzesteiersaz op 54 Prozent ze setzen, wier an den Aen vun der UEL "Gëft fir d'Wirtschaft", sou sot et de Jean-Paul Olinger nach kuerz nom Interview.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.