E Méindeg de Moie waren den Accueil vu Refugiéen an d'Familljepolitik Thema an der Emissioun "Invité vun der Redaktioun".

Migratioun an Accueil goufen, op Wonsch vum Premierminister Frieden, tëscht de Koalitiounspartner opgedeelt. Dat sot de Familljeminister Max Hahn e Méindeg de Moien am RTL-Interview. Den DP-Politiker behält de Familljeministère, ass elo awer och zoustänneg fir den Accueil vu Refugiéen. Et soll op jiddwer Fall mam CSV-Inneminister Léon Gloden zesummegeschafft ginn. Zesumme waren déi zwee Minister sech um Terrain och e Bild vun de Foyeren vum ONA, dem Office National de l'Accueil, maachen. Dat wier e ganz emouvanten Androck gewiescht, esou de Max Hahn, virun allem d'Kanner ze gesinn, déi do liewen.

Déi ganz Regierung an och d'Gemenge missten a Saache Flüchtlingspolitik méi zesummeschaffen. Dofir wier et och de klore Wonsch vum Luc Frieden gewiescht, den Accueil an d'Aussepolitik opzesplécken. Et wiere vill Ressorten implizéiert. Kloer wier awer och, datt d'Migratiounskris nëmmen op EU-Niveau kéint geléist ginn. Vill Länner géingen hirer Responsabilitéit net méi nokommen. Well antëscht méi Leit op Lëtzebuerg kommen, wier een als klengt Land och iergendwann un de Limitte vun den eegene Kapazitéiten ukomm. Dowéinst kéint een och net op déi ronn 100 Better am Foyer Don Bosco, dee schonn 2015 hätt missen zoumaachen, verzichten. Aktuell wier d'Prioritéit, d'Leit ënner Dach ze kréien. Strukturen zoumaachen, och wann se vereelzt sinn, wier deemno keng Optioun.

Et géing awer mam ONA no Léisunge gesicht ginn, well d'Liewenskonditiounen an dësem Foyer ganz schlecht sinn. Den zoustännege Minister huet awer bedauert, dass zum Deel Leit, déi de Statut vun der internationaler Protektioun scho kruten, sozial Logementsofferen, déi hinne gemaach ginn, aus verschiddenen Ursaachen net unhuelen. Dat géing dann dozou féieren, dass keng nei Demandeurs de protection internationale kënnen opgeholl ginn, well et eben u Better feelt.

Wat de Logement ugeet, esou wier dat den Haaptgrond fir den Aarmutsrisiko, sot de Max Hahn. Well Bénéficiaires de protection internationale, also Refugiéen, déi de Statut hunn, keen anere Logement fannen, wier et dacks schwéier fir si, de Foyer ze verloossen, obwuel si kéinten.

En anere Sujet, war de Congé parental, dee jo vu 6 op 9 Méint verlängert gëtt. Dat wier eng weider Variant, sou de Familljeminister Hahn. Kee kréich eppes ewechgeholl, et géing elo just d'Méiglechkeet bestoen, dësen ze verlängeren. Dass déi zousätzlech dräi Méint net bezuelt ginn, wier net just eppes fir eng gewësse sozial Schicht, huet de Max Hahn gemengt. De Congé parental hätt allgemeng ganz vill Succès, zanter dass et e gëtt an déi nei Optioun fir eng Verlängerung, wier just eng vu ville Méiglechkeeten, déi d'Familljen hunn.

Beim Kampf géint d'Inegalitéit missten déi verschidde sozial Mesurë reegelméisseg ugepasst, an och besser genotzt ginn. Vill Leit wéissten och net, vu wéi enge Mesurë se kéinte profitéieren. Fir besser ze informéieren, soll dowéinst eng digital Plattform geschaaft ginn, déi zentraliséiert a méi einfach soll fonctionéieren.

D'Famill an den Accueil wiere grouss Erausfuerderungen, dësem wier sech de Max Hahn bewosst sot hien. Ma säi Ministère ass doriwwer eraus zoustänneg fir Leit mat engem Handicap an och fir eeler Leit, esou wéi fir d’Zesummeliewen.

Flüchtlingspolitik: Een Dossier, opgedeelt op 2 Koalitiounspartner

Flüchtlingspolitik: Een Dossier, opgedeelt op 2 Koalitiounspartner
De Familljeminister Max Hahn ass jo och elo zoustänneg fir den Accueil vun de Refugiéeën. Hie war e Méindeg eisen Invité vun der Redaktioun.

Et wär den ausdréckleche Wonsch vum nei Premier Luc Frieden gewiescht, datt de Flüchtlings- Dossier hei am Land vu béide Koalitiounspartner gekuckt géif, sou de Familljeminister Max Hahn, dee jo elo och zoustänneg ass fir den Accueil vun de Refugiéeën.

De Problem gëtt also nees op zwee Ministère getässelt, nieft der Famille ass dat den Inneministère, wat de Max Hahn awer net dovunner ofhält, och d'Europäesch Unioun an der Flüchtlingskris mat an d'Responsabilitéit ze huelen.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.