En Dënschdeg de Moie war de Koalitiounsaccord Thema an der Emissioun "Invité vun der Redaktioun".

D'Staatsbeamte wieren d'Stéifkand vun der Politik. Vun den 209 Säiten am Koalitiounsaccord wieren der just zwou fir d'Fonction publique. Dat wier awer vläicht och net schlecht. Dat sot de Romain Wolff en Dënschdeg de Moien. De President vun der CGFP war eisen Invité vun der Redaktioun. D'Gewerkschaft fuerdert ëmmer nees, dass d'Attraktivitéit vum ëffentlechen Déngscht misst gesteigert ginn an dat, obwuel elo scho vill Leit vum Privatsecteur eriwwer wiesselen. Dorop äntwert den Invité, dass een d'Konditiounen effektiv net schlecht wieren, mee et kéint ee se nach steigeren. Zum Beispill, andeems een endlech de Gesetzestext fir den Télétravail ëmsetzt. Punkto Steierreform: Firwat waarde bis 2026?

Eng grouss Fuerderung vun der CGFP ass, eng integral Steierreform fir d'nächst Joer. D'Viraarbechte wier jo scho vun der leschter Regierung gemaach ginn a firwat waarde bis 2026, freet sech den Invité. De Romain Wolff huet Doutten, dass déi nei CSV-DP-Koalitioun d'Reform iwwerhaapt nach an dëser Legislaturperiod wëll realiséieren.

D'Staatsbeamtegewerkschaft hält dann och drop, datt d'Reform zu Gonschte vun de Stéit gemaach gëtt. Wéi dat soll finanzéiert ginn, wéisst een allerdéngs net. Aktuell wier et sou, dass ronn 75 Prozent vun der Steierlaascht vu Privatstéit bezuelt gëtt a 25 Prozent vun Entreprisen. Et wier kloer, dass een d'Verhältnes 50:50 net méi géing erreechen, mee am Barème misst sech awer eppes doen. D'Steierbarème sollen dowéinst un d'Inflatioun ugepasst ginn a steierlech Kaddoe fir déck Entreprisen ofgeschaaft ginn.

Kritik um Arméisgesetz

Kritik gouf et dann och nees um Artikel 32 vum neien Arméisgesetz, well domadder de Bewäertungssystem, deen duerch de Gehälteraccord ofgeschaaft gouf, duerch d'Hannerdier nees agefouert géif ginn. D'CGFP fuerdert, den Artikel misst komplett gestrach ginn. En Dënschdeg de Mëtteg wier déi éischt Ronn an der Conciliatiounsprozedur an et géing een drop hoffen, dass den neie Minister vun der Fonction publique, de Serge Wilmes, present wier oder vläicht schonn am Virfeld ee Signal géing ginn, fir dës Conciliatioun op Äis ze leeën an ze kucken, wéi ee politesch kéint weiderfueren.

"Silence vaut accord"

Iwwer de Prinzip "silence vaut accord", deen d'Regierung wëll aféieren, hätt een an der Gewerkschaft nach net geschwat, mee de Romain Wolff wier perséinlech ganz zefridden domadder. Et kéint jo net sinn, dass d'Leit éiweg waarden a wa se keng Äntwert kréien, dann ass et einfach ofgeleent. Mat dësem Prinzip géing de Spiiss ëmgedréint ginn an dat wier guer net sou falsch.

Quotesystem op héije Posten an der Fonction publique?

D'Regierung huet donieft am Accord annoncéiert, fir Mesuren ze huelen, fir eng méi equilibréiert Representatioun op héije Posten an der Fonction publique ze garantéieren. Wéi aktuell d'Opdeelung vu Männer a Frae wier, dat wéisst de Romain Wolff net. Hie géing sech awer och d'Fro stellen, wat genee mat engem "héije Poste" gemengt wier. Hie kéint sech virstellen, dass domadder d'riets oder d'lénks Hand vun de Ministere gemengt ass a géing dat als Mesure och net schlecht fannen, soulaang d'Kompetenzen do wieren. Domadder kéint jo ee Quotesystem agefouert ginn. Et misst ee gesinn, wéi dat an Zukunft gehandhaabt gëtt, sou den Invité.

Invité vun der Redaktioun: Romain Wolff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.