D’Zomm u Kreditter u Promoteure wier um Niveau vun 2019, wat weise géing, datt d’Banke weider Kreditter ginn.

An aktuell kënne just 1,34% vun den Immobilië-Prêten net zeréckbezuelt ginn. Dat sot den Direkter vun der Bankenassociatioun ABBL hei op RTL. Fir den Jerry Grbic weist dat alles, datt déi konservativ Approche vun de Lëtzebuerger Banke Friichten dréit.

Déi virsiichteg Approche an d’Zënshaussen iwwert déi lescht 18 Méint hunn den Zougank zu Kredit awer méi deier a méi schwéier gemaach. Fir verschidde Leit gouf de bestoende Kredit souguer e grousse Problem. Den Direkter vun der ABBL war awer optimistesch, datt sech d’Situatioun geschwë wäert stabiliséieren. Den Jerry Grbic rechent domadder, datt d’Zënse sech bei 3-4% wäerten apendelen. Gekoppelt un d’ Immobiliëpräisser, déi liicht zeréckgaange wieren, géing sech eng nei Realitéit erginn. Dat alles wäert eng "gewësse Stabilitéit" ginn an d’Leit zeréck op de Marché zéien.

Trotzdeem wëll d’CSV-DP-Regierung jo mat de Banken a mat den Iwwerwaachungsautoritéiten iwwert den Zougank zu Immobiliëkreditter schwätzen. Den Jerry Grbic huet gehofft, datt déi Gespréicher séier kommen. Leit, déi Problemer hunn en Iwwerbréckungskredit zeréckzebezuelen, kéinte mat hire Banken individuell Léisunge fannen. Donieft huet hien d’Iddi erwäänt, fir an exponentielle Situatiounen d’Zënsen ze kapitaliséieren. Anescht a graff ausgedréckt ginn d’Zënse verréckelt.

Den Jerry Grbic huet scho begréisst, datt déi nei Regierung nees méi mam Secteur wëll schwätzen. Et wier a sengen Ae wichteg nees zeréck zur "aler Stäerkt vum Land vun de kuerze Weeër" ze kommen. Fir am Interêt vun der ganzer Ekonomie a vum ganze Land ze schaffen. Déi konservativ Approche vun de Banken huet den ABBL-Direkter op en Neits als en Equiliber verdeedegt, tëscht deenen, déi Kredit wëllen an deenen, déi Sue spueren. Nëmme mat gesonde Banken a profitabele Clientë kéint béides geléngen.

Invité vun der Redaktioun: Jerry Grbic, Direkter vun der Bankenassociatioun ABBL

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.