E Mëttwoch de Moie waren d'Rekordzuel un Asyldemanden an d'Obdachlosegkeet zu Lëtzebuerg Thema an der Emissioun "Invité vun der Redaktioun".

Just nach 60 Better sinn an de Primo-Accueil-Strukture fir Flüchtlinge fräi, sou wéineg wéi nach ni, sot e Mëttwoch de Moien de Familljeminister Max Hahn am RTL-Interview, deen och zoustänneg ass fir den Accueil vun de Flüchtlingen. Quasi all 8.000 Better an de Flüchtlingsstrukture si besat. 3.900 Leit wollten zejoert e Bett an enger Struktur, dat ass neie Rekord.

Männer, déi schonn an engem anere Land eng Asyldemande gemaach hunn, kréien net méi d’Office e Bett, mä kommen op eng Waardelëscht. Eng 60 sinn aktuell op där Lëscht. Ouni déi Mesure, déi schonn de Minister Asselborn geholl huet, hätt ee soss guer keng fräi Better méi fir Familljen a Kanner, sou de Minister. Déi Krisegestioun misst ee fir de Moment bäibehalen.

Eng 300 Persoune kréien an der Moyenne all Mount e Bett zur Verfügung gestallt. Op där anerer Säit verloossen awer nëmmen tëscht 150 an 175 Leit all Mount d’Strukturen. Um fräie Marché fanne si keng Wunneng.

200 nei Better a Suen, wann ee privat een ophëlt

D’Regierung géif nei Strukture plangen. An den nächste Méint wëll een 200 nei Better offréieren. D’Integratioun vun de Flüchtlinge soll verbessert gi grad wéi den Zougang zum Aarbechtsmaart. Obligatoresch Sproochecoursë an e Cours vum gudden Zesummeliewe si geplangt. Privatleit, déi ee bei sech ophuelen, sollen an Zukunft och finanziell ënnerstëtzt ginn.

Groussen Zoulaf bei der Wanteraktioun

D’Wanteraktioun, déi zanter Mëtt November funktionéiert an nach bis de 15. Abrëll geet, huet groussen Zoulaf. Vun 250 huet een op 300 Better vergréissert an och gehëtzten Zelter opgeriicht. Zejoert hunn eng 230 Leit den Dag vun der Wanteraktioun profitéiert. Dëst Joer louch de Peak bis ewell bei 287 Leit. D’Demande geet an d’Luucht. Dat huet bestëmmt och mat der Waardelëscht ze dinn, sou de Minister Hahn. Jidderee kritt hei e Bett, also och déi Männer op der Waardelëscht.

Bis 2030 keng Obdachlosegkeet méi

Op den Heescheverbuet ugeschwat, huet de Max Hahn geäntwert, datt d’Aarmutsbekämpfung säin Haaptuleies wär. Do géif hie seng Energie drastiechen. Well et eng gewëssen Hëlleflosegkeet an der Politik ginn hätt, wären déi Decisioune geholl ginn, déi geholl goufen. Viséiert wier déi aggressiv oder organiséiert Heescherei. Mat oder ouni Heescheverbuet géif et him drëms goen, d’Obdachlosegkeet unzegoen.Dofir géif een nei Strukture plangen. Zu Berbuerg geet zum Beispill geschwënn en Altersheem fir Sans-Abrisen op. Bis 2030 soll kee méi op der Strooss liewen.

Invité vun der Redaktioun: Max Hahn

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.