E Sonndeg gouf um Circuit zu Colmer-Bierg den Optakt an d'Lëtzebuerger Slalom-Championnat gefuer. Och Formelween koumen an den Asaz.

Organiséiert gouf dëse Slalom vum High Speed Racing Club Luxembourg.

Am beschten iwwert d'Wanterpaus komm ass den Daniel Donkels, deen um Alfa Romeo 147 vum Monique Becker gestart ass. Weder de Renault Clio, nach de Ligier vu SADA-Racing ware prett, dofir ware se méi wéi frou, dass se op den Alfa zeréckgräife konnten.

An der 1. Course, deen aus 3 Leef bestoung, war um Enn den Daniel Donkels an enger Zäit vun 1:10,24 de Séiersten. Op Plaz 2 koum de Julien Freyermuth op engem Renault Clio 4 Cup (1:11,40), virum Marc Zenners op Subaru Impreza WRX (1:13,41).

RTL

An der 2. Course sollt sech op den zwou éischte Plazen näischt änneren, ausser d'Zäiten, déi nach emol e gudden Tick méi séier gi sinn.  Gewonnen huet nees den Daniel Donkels um Alfa Romeo 147 (1:07,66) virum Julien Freyermouth um Renault Clio Cup 4 (1:09,66). Déi 3. Plaz ka sech déi Kéier de Max Schiltz um Ford Fiesta sécheren, woumat en 1 Plaz besser ass, wéi an der 1. Course. Seng Beschtzäit loung bei 1:11,71min.

RTL

Challenge a Loisir

Nieft dem Slalom-Championnat gouf dann awer och nach e "Challenge" ugebueden, dëst fir Formelween. Hei sinn den Tommy Rollinger um Osella FA 30, Canio Marchione um Osella PA 21 an de Chris Klein um PRM Funboost ugetrueden. An der 1. Course ka sech den Tommy Rollinger behaapten, mat knapp 5 Sekonne Virsprong op de Canio Marchione. Fir de Chris Klein war nom éischte vun 3 Leef leider scho Schluss.

An der 2. Course waren du just nach Rollinger a Marchione mat der Partie. Och hei behält den Tommy Rollinger d'Iwwerhand a gewënnt domat béid Courssen.

3 Pilote waren dann ugemellt am "Loisir Slalom". Dëst waren d'Zoe Knebler op engem Honda Civic, den Thomas Mackenzie op engem Abarth 595 an d'Jil Wagner op engem Renault Twingo RS. Bei deenen Autoen handelt et sech ëm normal Stroossenautoen, a keng Course-Autoen.

A béide Coursse konnt sech dann och d'Zoe Knebler um Honda Civic behaapten, och wann an der 2. Course den Thomas Mackenzie bis op 3 Zéngtel un d'Beschtzäit vum Zoe Knebler erukomm war.

Testdag

Nieft dem Slalom war och nach eng gewëssen Zäit fir Testzwecker reservéiert. Hei konnten d'Piloten hir Course-Autoen um Circuit zu Colmer-Bierg virum Optakt vun der Saison op Häerz an Nieren préiwen.

D'Coursse goufen ënner strenge Sécherheetsmesuren ofgehalen. Zuschauer ware keng zougelooss an all d'Piloten hunn en negative Covid-Test musse virweise kënnen. Leit, déi keen negative PCR-Test virweise konnten, konnte samschdes e Schnelltest op der Plaz maache loossen.